नवी दिल्ली: इंदिरा गांधी इनडोअर स्टेडियममध्ये सुरू असलेल्या खो-खो विश्वचषक २०२५ मध्ये भारतीय महिला संघांने शतकी गुणांचा चौकार मारत बांगलादेशाचा पाडाव केला. भारतीय महिलांचे आक्रमण इतके जोरदार होते की त्यापुढे बगलादेशाचा सहज पाडाव होणार हे लक्षात आल्याने प्रेक्षकांनी सुरवातीपासूनच ढोल ताशांचा नगारा वाजवणे सुरु होते.

भारताची कर्णधार प्रियांका इंगळेने सरसेनापतीची भूमिका बजावत एक-एक खेळाडू बाद करताना जरासुद्धा दयामाया दाखवली नाही. तिला प्रमुख सरदाराच्या भूमिकेतील रेश्मा राठोडने आणि नसरीन शेखने मोलाची साथ दिल्याने बांगलादेशला माघारीची संधी सुद्धा न देता सरळ सरळ मोठा पराभव केला. भारतासाठी हा विजय खूप मोलाचा होता. यापुढे अजून दोन लढती असल्याने प्रतिस्पर्ध्यांच्या छातीत धडकी भरवण्यासाठी भारतीय छावणीत जोरदार तयारी केली होती आणि ती पूर्ण करण्यात सरसेनापती प्रियांका इंगळेने जरासुद्धा कसूर केली नाही.

भारताने नाणेफेक जिंकून प्रथम आक्रमण स्वीकारले होते. कर्णधाराने घेतलेला निर्णय सार्थ ठरवताना भारताने ५० गुणांची कमी केली. तर संरक्षणात ६ ड्रीम रान मिळवत मध्यंतराला ५६-०८ अशी मोठी आघाडी घेतली होती. तर मध्यंतरानंतर तोच धडाका कायम राखत भारताने बांगलादेशचा १०९-१६ असा ९३ गुणांनी धुव्वा उडवत खो-खो विश्वचषक २०२५ च्या उपांत्य फेरीत प्रवेश केला.