पुणे : ‘सकाळ माध्यम समूहा’तर्फे महाराष्ट्र व गोवा राज्यातील शालेय विद्यार्थ्यांसाठी येत्या रविवारी (ता. २ फेब्रुवारी) होणाऱ्या ‘सकाळ एनआयई- चित्रकला’ स्पर्धेच्या नोंदणीसाठी राज्यभरातून शालेय विद्यार्थी, विशेष विद्यार्थी आणि पालकांचा उत्स्फूर्त प्रतिसाद मिळाला आहे.

ज्या स्पर्धकांनी अजून नोंदणी केली नाही, त्यांना स्पर्धेच्या दिवशी प्रत्यक्ष स्पर्धा केंद्रांवर नावनोंदणी करून स्पर्धेत सहभागी होता येईल. यंदाची स्पर्धा प्राथमिक, माध्यमिक, उच्च माध्यमिक व महाविद्यालयीन युवक-युवती तसेच पालक व ज्येष्ठ नागरिकांसाठी खुली आहे.\

शालेय विद्यार्थ्यांच्या कलागुणांना वाव देण्यासाठी ‘सकाळ माध्यम समूहा’तर्फे १९८५ पासून ही स्पर्धा होत असून, यंदा स्पर्धेचे ४० वे वर्षे आहे. ‘सकाळ चित्रकला’ स्पर्धेत आतापर्यंत करोडो विद्यार्थ्यांनी भाग घेतला असून २०१८ मध्ये झालेल्या स्पर्धेतील लक्षणीय सहभागाची नोंद ‘एशिया बुक ऑफ रेकॉर्ड्स’ आणि ‘इंडिया बुक ऑफ रेकॉर्ड्स’ या जागतिक स्तरावरील प्रमाणित संस्थांनी घेतली आहे.