मुंबई : देशातील सर्वात मोठी दुचाकी उत्पादक कंपनी हिरो मोटोकॉर्पने डिसेंबर तिमाहीचे निकाल जाहीर केले आहेत. चालू आर्थिक वर्षाच्या तिसऱ्या तिमाहीत कंपनीचा निव्वळ नफा १२ टक्क्यांनी वाढून १,२०३ कोटी रुपये झाला. वाहनांच्या विक्रीत वाढ झाल्यामुळे कंपनीला हा नफा झाला. तसेच, गेल्या आर्थिक वर्षाच्या ऑक्टोबर-डिसेंबर तिमाहीत या कंपनीला १,०७३ कोटी रुपयांचा नफा झाला होता. दरम्यान, बाजार तज्ज्ञांनी कंपनीचा या तिमाहीचा नफा ११२२ कोटी असण्याचा अंदाज व्यक्त केला होता. यासोबतच कंपनीने सांगितले की त्यांच्या संचालक मंडळाने प्रति शेअर १०० रुपये (५,००० टक्के) अंतरिम लाभांश जाहीर केला आहे. उत्पन्न आणि विक्री किती हिरो मोटोकॉर्पने शेअर बाजाराच्या माहितीत म्हटले की, आर्थिक वर्ष २०२४-२५ च्या तिसऱ्या तिमाहीत ऑपरेटिंग उत्पन्न १०,२११ कोटी रुपयांपर्यंत वाढले, जे मागील आर्थिक वर्षाच्या याच तिमाहीत ९,७२३ कोटी रुपये इतके होते. कंपनीने सांगितले की, चालू आर्थिक वर्षाच्या तिसऱ्या तिमाहीत त्यांची विक्री १४.६४ लाख युनिट्स झाली आहे, जी मागील आर्थिक वर्षाच्या याच तिमाहीत १४.६० लाख युनिट्स होती. जानेवारीसाठी विक्रीचा अंदाजजानेवारीमध्ये हिरो मोटोकॉर्पची घाऊक विक्री २ टक्क्यांनी वाढून सुमारे ४.४३ लाख युनिट्सवर पोहोचली. गेल्या महिन्यात कंपनीने एकूण ४,४२,८७३ मोटारसायकली आणि स्कूटर विकल्या. गेल्या वर्षी याच कालावधीत कंपनीने एकूण ४,३३,५९८ वाहने विकली होती. कंपनीने जानेवारीमध्ये एकूण ४,००,२९३ मोटारसायकली आणि ४२,५८० स्कूटर विकल्या. हिरो मोटोकॉर्पने देशांतर्गत बाजारात एकूण ४,१२,३७८ वाहनांची विक्री केली, तर गेल्या वर्षी याच महिन्यात ४,२०,९३४ वाहनांची विक्री झाली होती. अशाप्रकारे, देशांतर्गत बाजारपेठेत त्यांची विक्री दोन टक्क्यांनी घटली. हिरो मोटोकॉर्पच्या गुंतवणूक योजनाहिरो मोटोकॉर्पच्या बोर्डाने ग्रुप कॅप्टिव्ह यंत्रणेअंतर्गत धारुहेरा आणि गुरुग्राममधील त्यांच्या प्लांटना अक्षय ऊर्जा पुरवण्यासाठी सोलर पॉवर व्हीलिंग प्रकल्पात ५.१५ कोटी पर्यंतच्या गुंतवणुकीला मान्यता दिली आहे.हिरो मोटोकॉर्पचे मुख्य वित्तीय अधिकारी (सीएफओ) विवेक आनंद म्हणाले, "या तिमाही आणि आर्थिक वर्षातील कामगिरी आमच्या धोरणात्मक प्राधान्यांच्या यशस्वी अंमलबजावणीला अधोरेखित करते. टॉप-लाइन आणि बॉटम-लाइन वाढीमध्ये वर्षभरातील मजबूत निकाल दर्शवित, आम्ही आतापर्यंतचा सर्वाधिक नऊ महिन्यांचा महसूल आणि नफा मिळवला आहे.