मुंबई : भारतीय शेअर बाजारांनी सोमवारी 17 मार्च रोजी जोरदार पुनरागमन केले. गेल्या 5 दिवसांच्या घसरणीचा ट्रेंड मोडून सेन्सेक्स 341 अंकांच्या उसळीसह बंद झाला. त्याच वेळी निफ्टी 22,500 च्या वर बंद झाला. यामुळे बीएसई लिस्टेड कंपन्यांचे बाजारमूल्य आज 1.65 लाख कोटी रुपयांनी वाढले आहे. मिडकॅप शेअर्समध्येही चांगली वाढ दिसून आली. मात्र, स्मॉलकॅप निर्देशांक जवळपास सपाट राहिले. आजच्या व्यवहारादरम्यान फार्मा आणि मेटल शेअर्समध्ये सर्वाधिक वाढ दिसून आली. बँक निफ्टीही सलग तिसऱ्या दिवशी वधारला मात्र, दुसरीकडे आयटी आणि एफएमसीजी शेअर्समध्ये आजही घसरण सुरूच आहे. व्यवहाराच्या शेवटी सेन्सेक्स 341.05 अंकांनी वाढून 74,169.95 वर बंद झाला. तर निफ्टी 112.45 अंकांनी वाढून 22,509.65 वर बंद झाला.बीएसईवर सूचीबद्ध कंपन्यांचे एकूण बाजार भांडवल आज 17 मार्च रोजी 392.83 लाख कोटी रुपयांपर्यंत वाढले आहे, जे त्याच्या आधीच्या ट्रेडिंग दिवशी म्हणजे गुरुवार, 13 मार्च रोजी 391.18 कोटी रुपये होते. अशाप्रकारे सूचीबद्ध कंपन्यांचे मार्केट कॅप 1.65 लाख कोटी रुपयांनी वाढले आहे. दुसऱ्या शब्दांत गुंतवणूकदारांच्या संपत्तीत 1.65 लाख कोटी रुपयांची वाढ झाली आहे.सेन्सेक्समधील 30 पैकी 20 शेअर्स वाढीसह बंद झाले. यामध्ये बजाज फिनसर्व्हच्या शेअर्समध्ये सर्वाधिक 3.59 टक्के वाढ झाली. यानंतर महिंद्रा अँड महिंद्रा (M&M), ॲक्सिस बँक, बजाज फायनान्स आणि अदानी पोर्ट्सचे शेअर्स 1.63 टक्क्यांपासून 2.41 टक्क्यांच्या वाढीसह बंद झाले. सेन्सेक्समधील उर्वरित 10 शेअर्स आज घसरणीसह बंद झाले. यामध्येही आयटीसीचे शेअर्स 0.98 टक्क्यांच्या घसरणीसह सर्वाधिक घसरले. त्याच वेळी, नेस्ले इंडिया, स्टेट बँक ऑफ इंडिया, रिलायन्स इंडस्ट्रीज आणि एशियन पेंटचे शेअर्स 0.50 ते 0.76 टक्क्यांपर्यंत घसरले.