2025 -26 கல்வியாண்டில் சிபிஎஸ்இ 10 மற்றும் 12 ம் வகுப்புகளுக்கான புதிய பாடத்திட்டம் அறிமுகப்படுத்தப்பட்டுள்ளது . மேலும் 10ம் வகுப்பு தேர்வு ஆண்டுக்கு இரண்டு முறை நடைபெறும் எனவும் தேர்வு முடிவுகள் வெளியாகும் தேதி தொடர்பான தகவலும் வெளியாகியுள்ளது.

 மத்திய அரசின் சிபிஎஸ்இ (CBSE) 2025-26 கல்வியாண்டிற்கான 10 மற்றும் 12 ம் வகுப்புகளின் புதிய பாடத்திட்டத்தை மாற்றம் செய்யப்பட்டு வெளியிட்டுள்ளது. அதன்படி 10ம் வகுப்பில் ஏற்கனவே உள்ள தேர்வு நடைமுறையில் குறிப்பிடத்தக்க மாற்றத்தைச் செய்துள்ளது. 

 அதன்படி இந்த ஆண்டு முதல், சிபிஎஸ்இ 10ம் வகுப்பு தேர்வு ஆண்டுக்கு இரண்டு முறை, பிப்ரவரி மற்றும் ஏப்ரல் மாதங்களில் நடைபெறும். இது மாணவர்களுக்கு கூடுதல் மதிப்பெண்களை பெறவும் தேர்ச்சி பெறவும் அதிக வாய்ப்புகளைத் தருகிறது. மேலும் பாட திட்டத்தின் படி மனப்பாடம் செய்வதைவிட, திறன் சார்ந்த கேள்விகள் மூலம் புரிந்து கொண்டு தேர்வு எழுதவும் வழி வகை செய்யப்படும் என தெரிவிக்கப்பட்டுள்ளது. 

இதனிடையே சிபிஎஸ்சி பாடத்திட்டத்தின் கீழ் படிக்கும் மாணவ, மாணவிகளுக்கு 10 வது மற்றும் 12ம் வகுப்பு பொதுத்தேர்வுகள் பிப்ரவரி மாதம் 15ம் தேதி தொடங்கி மார்ச் மாதம் இறுதி வரை நடைபெற்றது. 2024-25 வாரியத் தேர்வுகளை சுமார் 42 லட்சம் மாணவர்கள் எழுதியுள்ளனர். இதன் படி 10 ஆம் வகுப்பு படிக்கும் 24.12 லட்சம் மாணவர்கள் 84 பாடங்களில் தேர்வு எழுதியுள்ளனர், அதே நேரத்தில் 12ம் வகுப்பு பொதுத்தேர்வுகள் 120 பாடங்களுக்கு 17.88 லட்சத்துக்கும் அதிகமானோர் தேர்வு எழுதியுள்ளனர். 10வது மற்றும் 12வது புதிய பாடத்திட்டம் குறித்த அதிகாரபூர்வ அறிவிப்புக்கள் குறித்த மேலதிக தகவல்களுக்கு https://docs.google.com/viewerng/viewer?url=https://cbseacademic.nic.in/web_material/Circulars/2025/14_Circular_2025.pdf மூலம் அறிந்து கொள்ளலாம் எனத் தெரிவிக்கப்பட்டுள்ளது.

இதுவரை தேர்வு முடிவுகள் எந்த தேதியில் வெளியாகும் என அதிகாரப்பூர்வமாக அறிவிக்கவில்லை.2023ல் மே மாதம் 12ம் தேதியும், 2024ம் ஆண்டு மே மாதம் 13ம் தேதியும் 10 வது மற்றும் 12 ம் வகுப்பு தேர்வு முடிவானது வெளியிடப்பட்டுள்ளது. அந்த வகையில் நடப்பாண்டுக்கான சிபிஎஸ்இ தேர்வு முடிவுகள் மே மாதம் 10ம் தேதி முதல் 15ம் தேதிக்குள் வெளியாகும் என தெரிவிக்கப்பட்டுள்ளது.