बेळगाव : मानसिक अत्यवस्थेतून बसचालकाने आत्महत्या केल्याची धक्कादायक घटना घडली. भालचंद्र तुकोजी (वय ४५, रा. औरादी, ता. रामदुर्ग) असे त्याचे नाव असून, गेल्या २० वर्षांपासून ते परिवहन महामंडळाच्या (Transport Corporation) विभागात बसचालक (Bus Driver) म्हणून काम करत होते.

भालचंद्र हे काही काळापासून कंबरदुखीने त्रस्त होते. त्यांनी वैद्यकीय कारणास्तव रजा मागितली होती; परंतु वरिष्ठ अधिकाऱ्यांनी ती मंजूर केली नाही, अशी तक्रार कुटुंबीयांनी केली आहे. तसेच भालचंद्र यांची पत्नीही त्यांना मानसिक त्रास देत असे, असे (Belgaum Police) सांगितले. यामुळे भालचंद्र यांनी मानसिक अस्वस्थतेतून आत्महत्या केली.

बुधवारी (ता. २) सकाळी साडेसहा वाजता ते कामावर हजर झाले. सात वाजता बस सुरू होण्याच्या वेळी इतर कर्मचाऱ्यांनी त्यांना शोधले तेव्हा ते दिसून आले नाहीत. दरम्यान, भालचंद्र यांनी बसमध्ये गळफास घेतला. बस रवाना होण्यापूर्वी शोध घेतला असता इतर कर्मचाऱ्यांना भालचंद्र यांचा मृतदेह आढळला.

ही बातमी लगेच वाऱ्यासारखी पसरली आणि आगारामध्ये खळबळ उडाली. मार्केट पोलिसांना घटनेची माहिती देण्यात आली. पोलिसांनी येऊन पंचनामा केला. भालचंद्र यांच्या आईने सुनेच्या त्रासाला कंटाळून मुलग्याने गळफास घेऊन आत्महत्या केली आहे, अशी फिर्याद दिली आहे. यामुळे मार्केट पोलिस अधिक तपास करीत आहेत.