पुणे: शहरातील नामांकित सिंबायोसिस कॉलेजमध्ये मध्ये प्रवेश करून देण्याचे तरुणांना आमिष दाखवत डोनेशन आणि फी च्या नावाखाली लाखो रुपयांची मागणी करण्यात आल्याचा प्रकार समोर आला. सिंबायोसिस कॉलेजमध्ये एमबीए प्रवेशासाठी खोटी जाहिरात तयार करणाऱ्या तिघांना पोलिसांनी ताब्यात घेतलं आहे. या प्रकरणी आकाश यादव, कुणाल कुमार आणि दिव्या नामक तरुणीवर डेक्कन पोलिस ठाण्यात गुन्हा दाखल करण्यात आला आहे.
सोशल मीडियावर कॉलेजची खोटी जाहिरात तयार करून तरुणांना जाळ्यात ओढायचा प्रयत्न या तिघांनी केला. त्यासाठी आरोपींनी भव्य ऑफिसही थाटलं होतं. या संदर्भात महाविद्यालयाच्या व्यवस्थापनाकडून पोलिसात तक्रार देण्यात आली आहे.
मिळालेल्या माहितीनुसार, महाविद्यालयाच्या व्यवस्थापनातील एक जण यूट्युब बघत असताना त्यांना एका चॅनलवर सिंबायोसिस संस्थेचा लोगो असलेल्या इमारतीचा फोटो दिसला. त्यावर सिंबायोसिसमध्ये एमबीए अॅडमिशनसाठी मॅनेजमेंट कोट्यातून प्रवेश हवा असल्यास ज्यांचे बजेट आहे त्यांनी दिलेल्या क्रमांकावर साधावा अशी खोटी जाहिरात दिसून आली. त्यांनी तात्काळ ही बाब महाविद्यालयाच्या वरिष्ठांना सांगितली आणि तात्काळ डेक्कन पोलिसात तक्रार दिली.
संस्थेने प्रकरण जाणून घेण्यासाठी त्या जाहिरातीत दिलेल्या नंबरवर संपर्क साधला असता यातील एका आरोपीने त्यांना नोयडामध्ये असल्याचं सांगितलं. तसेच अॅडमिशनसाठी तुम्ही पुण्यातील बाणेर भागात असलेल्या ऑफिसवर जायला सांगितलं. त्या ऑफिसवर गेल्यावर यातील दुसऱ्या आरोपीने सुरुवातीला 5 लाख रुपये आणि मूळ कागदपत्रे द्यावी लागतील, आम्ही तुमचे नाव मेरिट लिस्टमध्ये टाकू असं सागितलं. तुम्ही उशीर केल्यास डोनेशनचे पैसे वाढत जातील असेही सांगितले.
त्या ऑफिसमधील आरोपी तरुणाने सांगितले की, सुरुवातीला पाच लाख रुपये द्यावे लागतील. त्यानंतर तुम्हाला महिन्याभरात सिंबायोसिसमधून मेल येईल. त्या ठिकाणी जाऊन तुम्ही रितसर अॅडमिशन फी भरुन अॅडमिशन घ्या असे सांगितले. त्यानंतर उर्वरित 15 लाख रुपये माझ्याकडे येऊन भरल्यानंतर तुमचे मूळ कागदपत्रे तुम्हाला परत मिळतील. 15 लाख रुपये दिले नाही तर तुम्हाला मूळ कागदपत्रे मिळणार नाहीत, तसेच तुमचे अॅडमिशन रद्द करणार असे सांगितले. तुम्हाला सिंबायोसिसमध्ये अॅडमिशन पाहिजे तर आम्हाला पैसे दिल्याशिवाय तुमच्याकडे पर्याय नाही.
आमच्या महाविद्यालयात प्रवेश घेण्यासाठी आम्ही कुठल्याही यूट्युब किंवा सोशल मीडियावर जाहिरात करत नाहीत. महाविद्यालयाचे नाव वापरून ही फसवणूक केल्याचा प्रकार आम्ही पोलिसात कळवलं आहे. आमच्या प्रवेशाची प्रक्रिया अतिशय पारदर्शकपणे असते. तसेच आम्ही कुठल्याही एजंट किंवा कन्सल्टन्सी यांना नियुक्त केलेले नाही. त्यामुळे सिंबायोसिसमध्ये अॅडमिशन घेण्याची जाहिरात तुम्हाला सोशल मीडियावर दिसली तर त्याला बळी पडू नका असे आवाहन सिंबायोसिस इन्स्टिट्यूट ऑफ बिझनेस मॅनेजमेंटचे संचालक डॉ. श्रीरंग आलटेकर यांनी केलं आहे.
आरोपींच्या विरोधात डेक्कन पोलिस ठाण्यात भारतीय न्याय संहिता कलम 319, 336 (3), 340(1), 340(2), 61, 62, 66 (ड) या अन्वये गुन्हा दाखल करण्यात आला आहे. संबंधित प्रकरणाचा तपास पुणे पोलिसांच्या गुन्हे शाखेकडून सुरू आहे.
ही बातमी वाचा:
अधिक पाहा..
