इंडियन प्रीमियर लीग २०२५ स्पर्धेत गुरुवारी (१० एप्रिल) रॉयल चॅलेंजर्स बंगळुरू विरुद्ध दिल्ली कॅपिटल्स संघात सामना होत आहे. एम चिन्नास्वामी स्टेडियमवर होत असलेल्या या सामन्यात बंगळुरूने दिल्लीसमोर १६४ धावांचे माफक आव्हान ठेवले आहे. दरम्यान, या सामन्यात बंगळुरूने गमावलेली सर्वात पहिली विकेट सर्वाधिक चर्चेचा विषय ठरली.

या सामन्यात दिल्ली कॅपिटल्सने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे बंगळुरूकडून विराट कोहली आणि फिल सॉल्ट सलामीला फलंदाजीला उतरले होते. विराट सुरुवातीला सॉल्टला साथ देत होता, कारण सॉल्ट अत्यंत आक्रमक खेळत होता.

त्याने मिचेल स्टार्क विरुद्ध तिसऱ्या षटकात ६, ४, ४, नोबॉल ४, ६, लेग बाईज १, लेग बाईज ४ अशा एकूण ३० धावा चोपल्या होत्या. त्यामुळे बंगळुरूने ३ षटकातच ५० धावांचा टप्पा पार केला होता.

चौथ्या षटकात विराटने सुरुवात चांगली केली होती. त्याने अक्षर पटेलला एक चांगला षटकार खेचला होता. पण पाचव्या चेंडूवर मोठा गोंधळ झाल्याचे पाहायला मिळाले. सॉल्टने कव्हरच्या दिशेने शॉट खेळला होता आणि त्याला एक धाव पळून घ्यायची होती.