इंडियन प्रीमियर लीग २०२५ स्पर्धेत चेन्नई सुपर किंग्स संघ संघर्ष करत आहे. त्यांना आत्तापर्यंत ५ सामन्यांपैकी फक्त एकच सामना जिंकता आला आहे. अशातच आत चेन्नईला आणखी एक मोठा धक्का बसला. त्यांचा नियमित कर्णधार ऋतुराज गायकवाड उर्वरित हंगामातून बाहेर झाला आहे. त्यामुळे त्याच्या जागेवर पुन्हा यष्टीरक्षक फलंदाज एमएस धोनी चेन्नईचे नेतृत्व करताना दिसणार आहे.

ऋतुराजला ३० मार्च रोजी गुवाहाटीत राजस्थान रॉयल्सविरुद्ध फलंदाजी करताना डाव्या हाताच्या कोपराला तुषार देशपांडेने गोलंदाजी केलेला चेंडू लागला होता. त्यामुळे त्याच्या कोपरामध्ये फ्रॅक्चर झाले आहे. यामुळेच ऋतुराजला या हंगामातून बाहेर व्हावे लागले आहे. त्यामुळे ४३ वर्षीय धोनीने पुन्हा नेतृत्वाची धूरा सांभाळली आहे.

दरम्यान, आता आयपीएल २०२५ मधून बाहेर झाल्यानंतर पहिली प्रतिक्रिया समोर आली आहे. त्याने सांगितले आहे की तो जरी आयपीएलमधून बाहेर झाला असला, तरी तो संघासोबत असणार आहे.

सोशल मीडियावर ऋतुराजचा व्हिडिओ शेअर केला आहे. या व्हिडिओमध्ये प्रतिक्रिया देताना ऋतुराज म्हणाला, 'हॅलो, ऋतुराज बोलतोय. दुर्दैवाने झालेल्या कोपराच्या दुखापतीमुळे उर्वरित आयपीएल हंगामाला मुकावे लागणार असल्याने खूप वाईट वाटत आहे. पण आत्तापर्यंत तुम्ही दिलेल्या पाठिंब्यासाठी धन्यवाद.'

'हो, आम्ही सध्या संघर्ष करत आहोत, पण आता तरुण यष्टीरक्षक (एमएस धोनी) संघाचे नेतृत्व करणार आहे. आशा आहे की गोष्टी बदलतील. मी संघासोबत असणार आहे आणि त्यांना खरंच पाठिंबा देत राहणार आहे.'

'नक्कीच मला आत्ता जी परिस्थिती आहे, त्यातून संघाला बाहेर काढायला आवडले असते. पण तुम्हालाही माहिती आहे की काही गोष्टी नियंत्रणात नसतात. मी म्हटल्यानुसार मी संघाला डगआऊटमधून पाठिंबा देत राहणार आहे आणि आशा आहे की आमच्यासाठी उर्वरित हंगाम चांगला असेल, आभारी आहे.'