टेंभुर्णी : झोप येत असल्याने कार महामार्गाच्या बाजूला लावून झोपलेला मुलगा व त्याच्या आईला तीन चोरट्यांनी कोयत्याचा धाक दाखवून व डोळ्यात चटणी टाकून सुमारे सहा लाख रुपये किमतीचे दागिने व साडेतीन हजारांची रोकड लंपास केली. पुणे सोलापूर महामार्गावर भुईंजे हद्दीतील यशराज हॉटेल समोर शनिवारी पहाटे दोन वाजून पन्नास मिनिटांच्या सुमारास ही घटना घडली. टेंभुर्णी ठाण्यात तिघांविरुद्ध गुन्हा दाखल करण्यात आला आहे.

याविषयी पोलिसांकडून समजलेली अधिक माहिती अशी, विशाल रामचंद्र सूर्यवंशी (वय- ४२ रा. उमरगा जि. धाराशिव) यांनी टेंभुर्णी ठाण्यात फिर्याद दिली. त्यानुसार विशाल सूर्यवंशी व त्यांची आई शकुंतला सूर्यवंशी हे दोघे एका नातेवाईकाच्या विवाह सोहळ्यास श्रीगोंदा (जि. नगर) येथे गेले होते. श्रीगोंदा येथून रात्री कारने (एमएच-२५/आर ३१२०) उमरगा येथे परत निघाले होते.

शनिवारी (ता. १९) पहाटे दोन वाजून चाळीस मिनिटे ते दोन वाजून पंचावन्न मिनिटांच्या दरम्यान पुणे - सोलापूर महामार्गावर टेंभुर्णीच्या पुढे दहा किलोमीटर अंतरावर विशाल सूर्यवंशी यांना झोप येत असल्याने त्यांची कार भुईंजे गावच्या हद्दीतील यशवंत हॉटेल समोर महामार्गाच्या बाजूस उभी करून झोपले होते. त्यावेळी २२ ते २५ वयोगटातील तरुण चोरटे तेथे आले. त्यांनी विशाल सूर्यवंशी यांच्या गळ्याला कोयता लावून धमकी दिली. कोयत्याचा धाक दाखवून व डोळ्यात चटणी टाकून एकाने फिर्यादीकडील साडेतीन हजार रुपये काढून घेतले.

त्यानंतर त्याच्या सोबत असलेल्या दोघांनी विशाल सूर्यवंशी यांची आई शकुंतला यांच्या बाजूस जाऊन डोळ्यात चटणी टाकून त्यांना कोयत्याचा धाक दाखविला. या चोरट्यांनी त्यांच्याकडील सहा तोळे वजनाच्या दोन सोन्याच्या पाटल्या (बांगड्या), तीन तोळे वजनाच्या सोन्याच्या दोन बांगड्या, अर्धा तोळे वजनाच्या सोन्याच्या दोन अंगठ्या, एक तोळे वजनाचे कानातील सोन्याची झुबे फुले व एक तोळे वजनाची सोन्याची गळ्यातील चेन असा एकूण बारा तोळे वजनाचे सोन्याचे दागिने जबरदस्तीने काढून घेऊन चोरून नेले.

या चोरट्यांनी विशाल यांना पोलिसांकडे न जाण्यासाठी दमदाटी करून धमकी दिली. घटनास्थळापासून काही अंतरावर गेल्यावर विशाल सूर्यवंशी यांनी ११२ वर कॉल करून घटनेची माहिती पोलीसांना दिली. यानंतर टेंभुर्णी पोलिस तातडीने घटनास्थळी आले. तोपर्यंत चोरटे पसार झाले होते. पुढील तपास पोलीस उपनिरीक्षक कुलदीप सोनटक्के करीत आहेत.