(Thackeray on Mahayuti) मुंबई : शिक्षणमंत्री दादा भुसे यांनी राज्यातील शिक्षकांनाही गणवेश देण्याची घोषणा केली आहे. राज्यातील शिक्षकांना गणवेश मिळणार असतील तर मग हे गणवेश मुख्यमंत्री, मंत्री, आमदार आणि प्रशासकीय अधिकाऱ्यांनाही असायला हरकत नाही. महाराष्ट्राच्या विधिमंडळात अधिवेशन काळात ‘फॅन्सी ड्रेस’ स्पर्धाच लागते आणि तेथे आपल्या श्रीमंतीचे दर्शन घडवण्याचा प्रयत्न होतो. त्यामुळे शासनातील ही समानता सर्वच पातळ्यांवर हवी. राजकारणी मंडळीचा ‘ड्रेस कोड’ पांढरा आहे. पण काहीजण झगमगीत रंगीबेरंगी सदरे, झब्बे यांचे प्रदर्शन घडवीत असतात. तर काहीजण उगाच सुटाबुटाचा सायबी थाट करून मंत्रालयात, विधिमंडळात वावरत असतात, अशी टीका माजी मुख्यमंत्री उद्धव ठाकरे यांनी केली आहे. (Thackeray targets MLA, ministers over dress code)

आता गणवेश म्हणजे ड्रेस कोड फक्त शिक्षक किंवा पोलिसांनाच कशाला? आय.ए.एस. अधिकाऱ्यांनाही गणवेश द्या आणि मंत्र्यानीही स्वतःचा गणवेश ठरवावा. फक्त कपड्यात नव्हे तर सर्वच बाबतीत ही समानता हवी. मंत्र्यांची दालनेही एकसारखी नाहीत. शासकीय कार्यालयात हवे तसे काम करून तिजोरीवर भार टाकलाच आहे. सर्व मंत्र्यांची कार्यालये, त्यावर फर्निचर, व्यवस्था एकसारखी असायला हरकत नाही. मंत्र्यांना सरकारी गाड्या मिळतात! पण तेथेही कोणताही ‘कोड’ नाही. सर्वच मंत्र्यांनी सरकारी वाहन वापरावे हा नियम का होत नाही? असा प्रश्नही त्यांनी केला आहे.

जो तो आपापल्या मगदुराप्रमाणे मर्सिडीज, बीएमडब्ल्यू, रेंज रोव्हरसारख्या विदेशी महागड्या गाड्या घेऊन मंत्रालयात आणि विधिमंडळात येतो, गावखेड्यात जातो आणि सरकारी गाड्यांत मंत्र्यांचे चेलेचपाटे बसून सरकारी पैशांचा धुरळा उडवतात. त्यामुळे मंत्र्यांच्या गाडी वापराबाबतही ‘समान’ नियम व्हायलाच हवेत. शिक्षकांच्या गणवेशाची बात निघाली म्हणून हे सांगायचे. हा सर्व श्रीमंती थाटमाट स्वकष्टातून आलेला नाही. मग त्याचे आता ओंगळवाणे प्रदर्शन घडवून जनतेच्या गरिबीची थट्टा का उडवायची? असा प्रश्न सामना दैनिकातील अग्रलेखातून विचारण्यात आला आहे.

मोदींच्या ड्रेस कोडचे काय करावे?

पंतप्रधान नरेंद्र मोदी हे दिवसातून चारेक वेळा ‘ड्रेस’ बदलतात. त्यामुळे त्यांच्या ड्रेस कोडचे काय करावे? पुन्हा ते एका वेळेला 10 लाखांचा सूट वापरतात. त्याच्या नेमके उलट उत्तर प्रदेशचे मुख्यमंत्री योगी आदित्यनाथ यांच्या ड्रेस कोडचे म्हणावे लागेल. भगवी कफनी आणि लुंगी हा त्यांचा ड्रेस कोड त्यांच्या आध्यात्मिक राहणीमानास शोभणारा आहे. पण ते राजकारणात आहेत आणि मुख्यमंत्रीसुद्धा आहेत, असा टोला त्यांनी लगावला आहे.

दक्षिणेतील राजकारणी शुभ्र लुंगी तसेच शर्टात वावरतात. पण त्यांच्या शाळेच्या विद्यार्थ्यांना हा ड्रेस कोड लागू नाही. चिदंबरम हे संसदेत तसेच मंत्रिमंडळाच्या बैठकांना ‘लुंगी’ घट्ट करून येत असत. पण सुप्रीम कोर्टात कडक इस्त्रीच्या शर्ट, पॅन्ट आणि काळ्या कोटातच येतात. त्यामुळे कोणता ड्रेस कोड खरा हा प्रश्नच आहे, असा प्रश्न ठाकरे यांनी केला आहे.