Shirish Valsangkar Death Case: प्रख्यात न्यूरॉलॉजिस्ट डॉ. शिरीष वळसंगकर यांच्या आत्महत्या प्रकरणाने संपूर्ण शहराला हादरवून सोडले आहे. या प्रकरणातील तपासात पोलिसांना बाथरूममधून धक्कादायक वस्तू सापडल्या असून, यामुळे अनेक प्रश्न उपस्थित झाले आहेत. डॉ. वळसंगकर यांनी स्वतःवर गोळी झाडून आत्महत्या केली, त्या ठिकाणी सिगारेटची 15 ते 18 थोटकं आणि एक रिकामे सिगारेट पॉकेट सापडले आहे. पोलिसांनी या वस्तू जप्त करून तपासाला सुरुवात केली आहे. या प्रकरणातील गूढ आणखी गहिरे होत असल्याने सर्वांचे लक्ष पोलिस तपासाकडे लागले आहे.

पोलिसांनी घटनास्थळाचा पंचनामा केला असता, यांच्या बाथरूममधून सिगारेटची थोटकं, दोन गोळ्या आणि एक पिस्टल सापडले. या वस्तूंची नोंद करून त्या तपासासाठी जप्त करण्यात आल्या आहेत.

वरिष्ठ पोलिस अधिकाऱ्यांनी दिलेल्या माहितीनुसार, डॉ. वळसंगकर यांनी आत्महत्येच्या दिवशी रुग्णालयात रुग्णांना भेटल्यानंतर रात्री आठच्या सुमारास घरी परतले होते. त्यावेळी त्यांची पत्नी डॉ. उमा आणि सांगलीहून आलेली मुलगी नेहा हॉलमध्ये गप्पा मारत होत्या. डॉ. वळसंगकर थेट बेडरूममध्ये गेले आणि काही वेळाने बाथरूममध्ये जाऊन त्यांनी स्वतःवर गोळी झाडली.

या प्रकरणात सापडलेले पिस्तूल आणि गोळ्या मुंबईतील बॅलेस्टिक तज्ज्ञांकडे पाठवण्यात आल्या आहेत. डॉ. वळसंगकर यांनी आत्महत्येसाठी त्याच बंदुकीचा वापर केला का, याची पडताळणी केली जाणार आहे. याशिवाय, बाथरूममधून सापडलेले काही साहित्य फॉरेन्सिक तपासासाठी मुंबईच्या प्रयोगशाळेत पाठवण्यात आले आहे. या तपासातून आत्महत्येच्या कारणांचा आणि परिस्थितीचा अधिक खुलासा होण्याची शक्यता आहे.

डॉ. शिरीष वळसंगकर हे न्यूरॉलॉजी क्षेत्रातील नावाजलेले डॉक्टर होते. त्यांच्या आत्महत्येमुळे कुटुंबीयांसह संपूर्ण वैद्यकीय समुदायाला मोठा धक्का बसला आहे. या प्रकरणात सिगारेटच्या थोटकांसारख्या असामान्य गोष्टी समोर आल्याने अनेक तर्कवितर्कांना उधाण आले आहे. पोलिस आत्महत्येच्या कारणांचा शोध घेत असून, फॉरेन्सिक अहवालाची प्रतीक्षा करत आहेत.

डॉ. वळसंगकर यांच्या आत्महत्येचे नेमके कारण आणि त्यामागील परिस्थिती अद्याप अस्पष्ट आहे. पोलिसांचा तपास आणि फॉरेन्सिक अहवाल यामुळे या प्रकरणातील गूढ उलगडण्यास मदत होईल, अशी अपेक्षा आहे.