United Breweries Q4 Results, Dividend : मद्य उत्पादक कंपनी युनायटेड ब्रुअरीजने बाजार बंद झाल्यानंतर आर्थिक वर्ष २०२५ च्या चौथ्या तिमाहीचे निकाल जाहीर केले आहेत. तसेच, कंपनीने त्यांच्या गुंतवणूकदारांना १००० टक्के लाभांश जाहीर केला आहे. ३१ मार्च २०२५ रोजी संपलेल्या तिमाहीत युनायटेड ब्रुअरीजचा निव्वळ नफा १९.९ टक्क्यांनी वाढला आहे. याशिवाय, कंपनीने महसूल आघाडीवरही चांगली वाढ नोंदवली असून बुधवारी व्यापार सत्रात कंपनीचा शेअर २ टक्क्यांच्या वाढीसह बंद झाला. १० रुपयांचा लाभांश जाहीरयुनायटेड ब्रुअरीजच्या नियामक फाइलिंगनुसार, कंपनीच्या संचालक मंडळाने १ रुपये दर्शनी मूल्य असलेल्या शेअर्सवर प्रति शेअर १० रुपये (१०००%) अंतिम लाभांश जाहीर केला आहे. कंपनीने या लाभांशासाठी ३१ जुलै २०२५ ही रेकॉर्ड तारीख निश्चित केली आहे. कंपनीच्या वार्षिक सर्वसाधारण सभेत भागधारकांकडून त्याची मंजुरी घेतली जाईल. मंजुरीनंतर, हा लाभांश ४ सप्टेंबर २०२५ पर्यंत दिला जाईल. ३१ मार्च २०२५ रोजी संपलेल्या तिमाहीत कंपनीचा निव्वळ नफा वार्षिक आधारावर ८१.५५ कोटी रुपयांवरून ९७.७६ कोटी रुपयांवर पोहोचला आहे. महसूलात ९ टक्क्यांनी वाढशेअर बाजाराला दिलेल्या माहितीनुसार, २०२५ या आर्थिक वर्षाच्या चौथ्या तिमाहीत युनायटेड ब्रुअरीजचा महसूल ९ टक्क्यांनी वाढून २३२२ कोटी रुपये झाला आहे. गेल्या आर्थिक वर्षाच्या याच कालावधीत तो २,१३३.३८ कोटी रुपये होता. याशिवाय, ऑपरेटिंग नफा ३१ टक्क्यांनी वाढून १८६.७१ कोटी रुपये झाला आहे. आर्थिक वर्ष २४ च्या याच कालावधीत ते १४२.८१ कोटी रुपये होते. वार्षिक आधारावर मार्जिन ६.७ टक्क्यांवरून ८ टक्क्यांपर्यंत वाढले आहे. कंपनीचा शेअर वाढीसह बंदबुधवारी व्यापार सत्रादरम्यान बीएसईवर युनायटेड ब्रुअरीजचा शेअर २.१२% किंवा ४५.४० अंकांच्या वाढीसह २१८४.४५ रुपयांवर बंद झाला. कंपनीचा एनएसईवरील शेअर २.७७% किंवा ५९.२० अंकांच्या वाढीसह २,१९६ रुपयांवर बंद झाला.कंपनीचा ५२ आठवड्यांचा उच्चांक २,२९९.७० रुपये आणि ५२ आठवड्यांचा नीचांक १८१० रुपये आहे. या वर्षी आतापर्यंत कंपनीच्या शेअरमध्ये ४.९५%, गेल्या सहा महिन्यांत १३.४९% आणि एका वर्षात ९.५१% वाढ झाली आहे.