आयपीएलच्या 18 व्या मोसमातील प्लेऑफसाठी 4 संघ निश्चित झाले आहेत. मात्र त्यानंतर आता टॉप 2 साठी जोरदार चुरस पाहायला मिळत आहे. टॉप 2 मध्ये असणाऱ्या संघाला अंतिम फेरीत पोहचण्यासाठी 2 वेळा संधी मिळते. त्यामुळे प्लेऑफसाठी पात्र ठरलेल्या संघांत कायम चुरस पाहायला मिळते. मात्र यामध्ये स्पर्धेतून बाहेर झालेले संघही निर्णायक भूमिका बजावतात. या हंगामातील 65 व्या सामन्यात रॉयल चॅलेंजर्स बंगळुरु विरुद्ध सनरायजर्स हैदराबाद आमनेसामने आहेत. आरसीबीने प्लेऑफचं तिकीट मिळवलंय. मात्र त्यानंतरही आरसीबीसाठी हा सामना महत्त्वाचा आहे. तर दुसऱ्या बाजूला सनरायजर्स हैदराबाद केव्हा स्पर्धेतून बाहेर झालीय. मात्र त्यानंतरही एसआरएच आरसीबीचा गेम करु शकते.
सनरायजर्स हैदराबाद आणि रॉयल चॅलेंजर्स बंगळुरु दोन्ही संघांचा हा या मोसमातील 13 वा सामना असणार आहे.तसेच दोन्ही संघांची या मोसमात आमेसामने येण्याची ही पहिलीच वेळ ठरणार आहे. आरसीबीचा हा सामना जिंकून टॉप 2 मध्ये कायम राहण्याचा प्रयत्न असणार आहे. त्यामुळे आरसीबी कोणत्याही स्थितीत सामना जिंकण्यासाठी प्रयत्न करणार, हे निश्चित आहे. तर दुसऱ्या बाजूला हैदराबादकडे गमावण्यासारखं काहीच नाही. मात्र जाता जाता शेवटच्या 2 सामन्यांमध्ये विजयी मिळवण्याचा प्रयत्न हैदराबादचा असेल. तसेच हैदराबादच्या गोटात वादळी खेळी करणारे अनेक फलंदाज आहेत. त्यामुळे हैदराबादमध्ये एकतर्फी विजय मिळवण्याची क्षमता आहे. त्यामुळे या सामन्यात जोरदार रंगत पाहायला मिळू शकते.
आरसीबीने 12 पैकी 8 सामने जिंकले आहेत. तर 3 वेळा आरसीबीला पराभवाचा सामना करावा लागला आहे. तसेच एक सामना पावसामुळे रद्द करण्यात आला होता. त्यामुळे आरसीबी 17 गुणांसह पॉइंट्स टेबलमध्ये दुसऱ्या स्थानी आहे. तर हैदराबादने 12 पैकी 4 सामनेच जिंकले आहेत. हैदराबादला तब्बल 7 वेळा प्रतिस्पर्धी संघांनी पराभवाची धुळ चारली आहे. तर हैदराबादचाही 1 सामना पावसामुळे रद्द करण्यात आला. हैदराबाद 9 गुणांसह पॉइंट्स टेबलमध्ये आठव्या स्थानी आहे.
आयपीएल स्पर्धेच्या इतिहासात रॉयल चॅलेंजर्स बंगळुरु विरुद्ध सनरायजर्स हैदराबाद यांच्यात 24 सामने खेळवण्यात आले आहेत. आकडे पाहता हैदराबाद आरसीबी विरुद्ध वरचढ राहिल्याचं स्पष्ट होतं. हैदराबादने 24 पैकी 13 सामने जिंकले आहेत. तर आरसीबीने 11 सामन्यांमध्ये पलटवार करत विजय मिळवला आहे.
दरम्यान रॉयल चॅलेंजर्स बंगळुरु विरुद्ध सनरायजर्स हैदराबाद सामन्याला संध्याकाळी 7 वाजून 30 मिनिटांनी सुरुवात होईल. सामन्याचं आयोजन हे लखनौमधील एकाना स्टेडियममध्ये करण्यात आलं आहे. सामना टीव्हीवर स्टार स्पोर्ट्स नेटवर्कवरील चॅनेल्सवर पाहायला मिळेल. तर जिओहॉटस्टार एपद्वारे मोबाईल आणि लॅपटॉपवर लाईव्ह सामन्याचा थरार अनुभवता येईल.
