नाशिक : पुण्यातील वैष्णवी कस्पटे-हगवणे हिचा वेदनादायक पद्धतीने हुंडाबळी झाला. या घटनेनंतर यशवंतराव चव्हाण सेंटरने येत्या २२ जूनपासून राज्यव्यापी लढ्याचा निर्धार केला आहे. ‘हुंडामुक्त महाराष्ट्र-हिंसामुक्त कुटुंब’ मोहीम राबविण्यात येणार आहे. मोहिमेला पुण्यातून सुरूवात होईल, अशी माहिती राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी दिली.

खासदार सुळे म्हणाल्या, की पुण्यातील घटना मनाला वेदना देणारी घटना आहे. ज्या राज्याने स्त्री मुक्तीच्या दृष्टीने देशाला दिशा दाखविण्याचे काम केले. तेथे वैष्णवीसारख्या लेकीचा बळी जाणे, हे अतिशय संतापजनक आहे. कोणत्याही संवेदनशील माणसाला अस्वस्थ करणारे आहे. घटनेबाबत केवळ संताप आणि दुःख व्यक्त करून भागणार नाही. जोरदारपणे कृतिशील जागृतीचे पाऊल उचलावे लागेल. या पार्श्वभूमीवर २२ जूनपासून राज्यात हुंडाबळी व हिंसामुक्त महाराष्ट्रासाठी लढा उभारण्याचा निर्धार केला आहे. समाजातील सर्व घटक, सर्व यंत्रणांना सहभागी करून घेतले जाणार आहे. मोहिमेतूनच ‘हुंडामुक्त महाराष्ट्र आणि हिंसामुक्त कुटुंबा’चे उद्दिष्ट सध्या करता येईल आणि वैष्णवीला तीच खरी श्रद्धांजली ठरेल.

राज्याने तीन दशकांपूर्वी देशातील पहिले महिला धोरण २२ जून १९९४ ला तत्कालीन मुख्यमंत्री शरद पवार यांच्या पुढाकाराने जाहीर केले. ते धोरण तयार करण्यामध्ये महाराष्ट्रातील सर्व घटक आणि यंत्रणांनी योगदान दिले होते. त्यामुळे अनेक सामाजिक, राजकीय, आर्थिक बदल राज्यातील महिलांच्या जीवनात घडले. तरीही हुंड्यासारखी अनिष्ट प्रथा, महिलांना सहन करावा लागणारा कौटुंबिक हिंसाचार थांबवू शकलेला नाही. महाराष्ट्र शिव-फुले-शाहू-आंबेडकर यांच्या विचारांनी घडलेला आहे. राजमाता जिजाऊ, सावित्रीबाई फुले, पुण्यश्लोक राजमाता अहिल्यादेवी होळकर अशा कर्तृत्ववान महानुभावांची परंपरा राज्याला आहे.

गेल्या ५० वर्षांत राज्यात विविध संस्था, संघटना आणि व्यक्ती, स्त्री-पुरुष समतेची चळवळ कष्टाने आणि नेटाने पुढे नेत आहेत. २२ जूनपासून पुण्यातून मोहिमेची सुरुवात होईल. संपूर्ण वर्षभर वेगवेगळ्या टप्प्यांत ही मोहीम राज्याच्या सर्व भागांत राबविण्यात येईल. मोहिमेचे उद्दिष्ट पूर्ण होईपर्यंत पाठपुरावा केला जाणार आहे.

- सुप्रिया सुळे, खासदार