राज्यात आगामी काळात स्थानिक स्वराज्य संस्थांच्या निवडणुका पार पडणार आहेत. त्यामुळे सर्वच राजकीय पक्षांनी याची तयारी सुरु केली आहे. गेल्या काही वर्षांमध्ये राज्याच्या राजकारणात अशा घटना घडल्या आहेत, ज्यामुळे कोणताही पक्ष कोणासोबतही युती करण्याची शक्यता नाकारता येत नाही. अशातच आता उद्धव ठाकरे यांचा पक्ष शिवसेना उद्धव बाळासाहेब ठाकरे आणि असदुद्दीन ओवेसी यांचा पक्ष एआयएमआयएम यांच्यात युती होण्याची शक्यता आहे. याबाबत सविस्तर माहिती जाणून घेऊयात.
एआयएमआयएमच्या महाराष्ट्र युनिटने आगामी स्थानिक स्वराज्य संस्थांच्या निवडणुकीमध्ये शिवसेना उद्धव बाळासाहेब ठाकरे पक्षासोबत युती करण्याचे संकेत दिले आहेत. काही काळापूर्वी आमदार आदित्य ठाकरे यांनी राज्याच्या भल्यासाठी सर्व गैर-महायुती पक्षांना एकत्र येण्याचे आवाहन केले होते. त्यानंतर आता एआयएमआयएमने युतीबाबत सकारात्मक संकेत दिले आहेत.
एआयएमआयएमने दिले युतीचे संकेत
एआयएमआयएमचे मालेगावचे आमदार मुफ्ती इस्माइल कासमी यांनी म्हटले की. ‘ठाकरे आणि ओवैसी एकत्र यावेत अशी आमची इच्छा आहे. धर्म हा आमच्यासाठी मुद्दा नाही, आम्ही विकासाच्या मुद्द्यावर बोलू शकतो. जर कोणी आम्हाला विकासाच्या मुद्द्यावर बोलावले तर आम्ही स्वतः पुढे जाऊ. मात्र युती संदर्भात अंतिम निर्णय एआयएमआयएम प्रमुख ओवैसी घेतील.
आम्ही यापूर्वीही युतीचा प्रयत्न केला होता – मुफ्ती इस्माइल कासमी
एआयएमआयएमचे आमदार मुफ्ती इस्माइल कासमी यांनी पुढे बोलताना महत्वाची माहिती दिली आहे. मुफ्ती इस्माइल कासमी म्हणाले की, ‘आम्ही गेल्या विधानसभा निवडणुकीतही युती करण्याचा प्रयत्न केला होता. आम्हाला महाविकास आघाडीत सामील व्हायचे यायचे होते पण आम्हाला घेण्यात आले नाही. आता आदित्य ठाकरेंनी आवाहन केले आहे, मात्र ते आम्हाला सोबत घेणार की नाही हे आगामी काळ ठरवणार आहे.’
