Nigeria Benue Massacre: नायजेरियात जातीय आणि धार्मिक हिंसाचाराने पुन्हा एकदा डोके वर काढले. येथे हकनाक 100 गावकऱ्यांना त्यांचे प्राण गमवावे लागले. शुक्रवारी मध्यरात्री ते शनिवारी पहाटेपर्यंत येलेवाटा या गावात मृत्यूचे तांडव सुरू होते. बंदुकधाऱ्यांनी गावकऱ्यांना घराबाहेर काढून त्यांच्यावर अंदाधुंद गोळीबार केला. इतकेच नाही तर जे लोक घरात लपले होते. त्यांची घर जाळण्यात आली. त्यात होरपळून अनेक गावकऱ्यांचा मृत्यू झाला. या हत्याकांडानंतर नायजेरिया सरकारवर चोहोबाजूने टीकेची झोड उठली आहे. ॲमनेस्टी इंटरनॅशनल नायजेरियाने शनिवारी 14 जून रोजी भल्या पहाटे घडलेल्या या घटनेची माहिती दिली आहे.

मृतांचा आकडा वाढण्याची शक्यता

ॲमनेस्टी इंटरनॅशनल नायजेरियाने सोशल मीडिया प्लॅटफॉर्म एक्सवर या घटनेची माहिती दिली. त्यांच्या मते अजून अनेक लोक बेपत्ता आहेत. तर अनेक जण या घटनेत गंभीर जखमी आहेत. त्यांना सरकारकडून साध्या उपचाराची सोय सुद्धा करण्यात आली नाही. पुरुषांना बाहेर काढून गोळ्या घालण्यात आल्या. तर त्यांच्या कुटुंबांना बेडरूममध्ये बंद करून जाळण्यात आले. या घटनेवर जागतिक नेत्यांनी दुख व्यक्त केले आहे.

बेनुए राज्यात हिंसाचार

नायजेरियातील बेनुए राज्यात हिंसेचे लोण पसरले आहे. ॲमनेस्टी इंटरनॅशनल नायजेरियाच्या मते, गेल्या काही दिवसात हिंसक घटनांमध्ये मोठी वाढ झाली आहे. बंदुकधारी गावा गावात जाऊन अंदाधुंद गोळीबार करत आहेत. ते एकमेकांना ठार करत आहेत. नायजेरिया सरकार कुठलीच कायदेशीर कारवाई करत नसल्याने या हल्लेखोरांचा अतिरेक वाढला आहे. सतत हल्ले होत असल्याने अनेक गावातून लोकांनी पलायन केले आहे. या हल्ल्यात सर्वाधिक शेतकरी मारल्या जात आहेत.

जमिनीवर डोळा, धार्मिक, जातीयतेचा मुलामा

बेनुए हे राज्य नायजेरियाच्या मध्यवर्ती भागात आहे. येथील जमिनीवर भूमाफियांचा डोळा आहे. बेनुए राज्य हे उत्तरेतील मुस्लिम आणि दक्षिणतेली ख्रिश्चन यांचे संगम स्थळ मानण्यात येते. गुरूढोरं चारणारे आणि स्थानिक शेतकरी यांच्यात जमिनीवरून मोठा वाद आहे. यामध्ये जातीय आणि धार्मिक मुलामा देऊन गावकऱ्यांना लक्ष्य करण्यात येत आहे. त्यामुळे अनेक गावातील शेतकरी हे शहराकडे पलायन करत आहेत. त्यांच्या जमिनी कवडीमोल दराने विक्री करत आहेत. यापूर्वी झालेल्या हिंसाचारात 500 जणांना प्राण गमवावे लागले. आतापर्यंत 2.2 दशलक्ष लोकांनी हा भाग सोडल्याचा दावा करण्यात येत आहे. हे सध्याच्या काळात, रोहिंग्यापेक्षा सर्वात मोठे स्थलांतर असल्याचे सांगण्यात येते.