मुंबई : शेअर बाजारात असे अनेक शेअर्स आहेत ज्यांनी गुंतवणूकदारांना खूप कमी वेळात करोडपती बनवले आहे. पण या शेअर्सनी गुंतवणूकदारांना रडवलेही. असाच एक शेअर्स एलसिड इन्व्हेस्टमेंट्स लिमिटेडचा आहे. हा शेअर्स २९ ऑक्टोबर २०२४ रोजी बातम्यांमध्ये आला होता. यावेळी Elcid Investments Limited शेअर्सची किंमत एका झटक्यात ३.५३ रुपयांवरून २,३६,२५० रुपयांवर पोहोचली. या शेअरने अवघ्या २४ तासांत अनेक गुंतवणूकदारांना करोडपती बनवले.



६० टक्के कोसळला

Elcid Investments Limited चा शेअर्स भारतातील सर्वात महागडा बनला. त्याने MRF ला मागे टाकले होते. त्या वेळी एखाद्याकडे या कंपनीचे ५० शेअर्स असते तर तो करोडपती झाला असता. पण आता हा शेअर घसरणीच्या ट्रेंडमध्ये आहे. गेल्या ८ महिन्यांत शेअर्स खूपच घसरला आहे. बुधवारी एलसिड इन्व्हेस्टमेंट्स लिमिटेडचा शेअर्स ०.२४% च्या किरकोळ वाढीसह १.३० लाख रुपयांवर बंद झाला. या ८ महिन्यांत शेअर्स ६० टक्के कोसळला आहे. म्हणजेच त्याची किंमत निम्म्याहून कमी झाली आहे.

महागडा शेअर्स राहिला नाही

या घसरणीसह एलसिड इन्व्हेस्टमेंट्स लिमिटेडचा शेअर्स आता देशातील सर्वात महागडा शेअर्स राहिलेला नाही. एमआरएफ पुन्हा एकदा देशातील सर्वात महागडा शेअर्स बनला आहे. बुधवारी एमआरएफचे शेअर्स १.१२% वाढून १.४४ लाख रुपयांवर बंद झाले. यानंतर पेज इंडस्ट्रीजचा शेअर्स येतो. बुधवारी हा शेअर १.४४% घसरून ४७,५३० रुपयांवर बंद झाला.



किंमत ३ रुपये होती

२०११ पासून एलसिड इन्व्हेस्टमेंट्स लिमिटेडचा शेअर ३ रुपयांवर होता. पण त्याची बुक व्हॅल्यू ५,८५,२२५ रुपये होती. या मोठ्या फरकामुळे ज्या गुंतवणूकदारांकडे हा शेअर्स होता त्यांना तो विकायचा नव्हता. यामुळे २०११ पासून त्यात कोणताही व्यवहार झाला नाही.

लिलाव सेबीने आयोजित केला

होल्डिंग कंपन्यांचे सध्याच्ये बाजार मूल्य आणि बुक व्हॅल्यूमधील तफावत कमी करण्यासाठी सेबीने शेअर बाजारांना ज्या होल्डिंग कंपन्यांचे शेअर्स त्यांच्या बुक व्हॅल्यूपेक्षा खूपच कमी किमतीत व्यवहार करत होते त्यांच्यासाठी विशेष लिलाव सत्र आयोजित करण्यास सांगितले होते. यामुळे शेअर्समध्ये ६७ लाख टक्के वाढ झाली.