मुंबई : आयपीओमध्ये गुंतवणूक करणाऱ्यांसाठी महत्त्वाची बातमी आहे. टाटा समूहाची फायनान्स कंपनी टाटा कॅपिटल आपला आयपीओ आणत आहे. टाटा कॅपिटलने सर्व आवश्यक कागदपत्रे सेबीकडे दाखल केली आहेत. Tata Capital ipo चा आकार 2 अब्ज डाॅलर (17555 कोटी रुपये) असू शकतो. असे झाले तर हा 2025 सालातील आतापर्यंतचा सर्वात मोठा आयपीओ आणि देशातील आतापर्यंतचा चौथा सर्वात मोठा आयपीओ असेल.



रिझर्व्ह बँकेने काही मोठ्या एनबीएफसी (नॉन-बँकिंग वित्तीय कंपन्या) ला शेअर बाजारात सूचीबद्ध होण्यास सांगितले आहे. एनबीएफसी बँका नसतात. परंतु त्या कर्ज देतात आणि इतर वित्तीय सेवा देतात. Tata Capital देखील एक एनबीएफसी आहे. त्यामुळे या कंपनीला शेअर बाजारात सूचीबद्ध होणे अनिवार्य आहे. रिझर्व्ह बँकेच्या नियमांनुसार, सप्टेंबरच्या अखेरीस एनबीएफसी कंपन्या सूचीबद्ध होणे आवश्यक आहे. सूचीबद्ध झाल्यानंतर कंपनीचे मूल्य 11 अब्ज डाॅलर इतके होईल.



२१ कोटी नवीन शेअर्स

कंपनीने सादर केलेल्या DRHP (ड्राफ्ट रेड हेरिंग प्रॉस्पेक्टस) नुसार, या IPO मध्ये २१ कोटी नवीन शेअर्स जारी केले जातील. याशिवाय, ऑफर फॉर सेल (OFS) अंतर्गत २६.५८ कोटी शेअर्स विकले जातील. टाटा सन्स ओएफएसमध्ये २३ कोटी शेअर्स विकेल. तर इंटरनॅशनल फायनान्स कॉर्पोरेशन (IFC) ३.५८ कोटी शेअर्सची विक्री करेल. सध्या टाटा सन्सकडे टाटा कॅपिटलमध्ये ८८.६% तर IFC कडे १.८% हिस्सा आहे.



आयपीओ पैशाचा वापर

टाटा कॅपिटल नवीन शेअर्स जारी करण्यापासून मिळालेल्या पैशाचा वापर तिचा टियर-१ कॅपिटल बेस मजबूत करण्यासाठी करेल. यामुळे कंपनीला भविष्यात कर्ज देण्यासारख्या कामांसाठी अधिक पैसे मिळतील. टियर-१ कॅपिटल बेस म्हणजे कंपनीकडे उपलब्ध असलेले पैसे, जे तोटा झाल्यास ते वापरू शकते.



टाटाचा दुसरा मोठा आयपीओ

अलिकडच्या वर्षांत टाटा ग्रुपचा हा दुसरा मोठा आयपीओ असेल. यापूर्वी, टाटा टेक्नॉलॉजीजने नोव्हेंबर २०२३ मध्ये शेअर बाजारात भव्य पदार्पण केले होते. हा आयपीओ यशस्वी झाला तर तो भारतीय वित्तीय सेवा कंपनीचा सर्वात मोठा आयपीओ असेल.