• देहरादूनच्या रायपूर परिसरात मुसळधार पावसाने नद्या-नाले दुथडी भरून वाहत आहेत.

• प्रशासनाने सतर्कतेचा इशारा देत एनडीआरएफसह बचाव कार्य सुरू केले आहे.

• या पुरात लोकांचे दुभते प्राणी गाई-म्हैशी वाहून जाताना दिसले

Uttarakhand Flood Videos : उत्तराखंडमधील देहरादूनच्या रायपूर परिसरात गेल्या काही दिवसांपासून सुरू असलेल्या मुसळधार पावसाने जनजीवन विस्कळीत झाले आहे. सततच्या पावसामुळे परिसरातील नद्या आणि नाले दुथडी भरून वाहत आहेत. पाण्याचा प्रवाह इतका प्रचंड आहे की, अनेक ठिकाणी रस्ते, पूल आणि खालच्या भागात पाणी शिरले आहे.या पुराच्या पाण्यात लोकांच्या गाई-म्हैशी, दुभते प्राणी वाहून जाताना दिसले. ते जीव वाचवण्यासाठी धडपड करत होते. हा काळजाला हात घालणारा व्हिडिओ सोशल मीडियावर व्हायरल होतोय

रायपूर परिसरातील नद्यांमध्ये पाण्याची पातळी धोकादायक पातळीवर पोहोचली आहे. काही ठिकाणी पाण्याचा वेग इतका तीव्र आहे की, प्राणीही वाहून जात असल्याचे दृश्य समोर आले आहे. स्थानिक रहिवाशांनी सांगितले की, अशा प्रकारचा पाऊस आणि पूरपरिस्थिती यापूर्वी क्वचितच पाहिली आहे. यामुळे शेती, घरांचे नुकसान आणि वाहतुकीत अडथळे निर्माण झाले आहेत. अनेक कुटुंबांना सुरक्षित ठिकाणी स्थलांतरित करण्यात आले आहे.