கத்தி எடுத்தவன் கத்தியால் தான் சாவான், பயங்கரவாதத்தை கையில் எடுத்தவன் பயங்கரவாததிலேயே அழிவான். அதுபோல பயங்கரவாதத்தின் மூலம் இந்தியாவை தகர்க்கலாம் என்று கனவு கண்ட அதே பாகிஸ்தான் இன்று, அதுவே வளர்த்த அரக்கர்களால் நொறுங்கி கொண்டிருக்கிறது. ஆம், தலிபான் இன்று பாகிஸ்தானுக்கு எதிராக திரும்பிவிட்டது.
டூராண்ட் எல்லைக்கோட்டில் உள்ள 10-க்கும் மேற்பட்ட பாகிஸ்தானிய எல்லை சாவடிகளை தலிபான் கைப்பற்றி, 15-க்கும் மேற்பட்ட பாகிஸ்தான் வீரர்களை கொன்றுள்ளனர். உண்மையான எண்ணிக்கை இதைவிட அதிகமாக இருக்கலாம் என்றும் கூறப்படுகிறது. முஸ்லீம் சகோதரர்கள் என்று கூறிக்கொண்ட இரு அமைப்புகளுக்கு இடையே ஒரு முழுமையான போர் வெடித்துள்ளது.
இது இந்தியாவுக்குக் கிடைத்த பொன்னான வாய்ப்பா? பாகிஸ்தான் ஆக்கிரமிப்பு காஷ்மீரை மீட்டெடுக்க இந்தியா பதிலடி கொடுக்க இதுவே சரியான தருணமா?
ஆபரேசன் சிந்தூர் போரில் அடைந்த அவமானகரமான தோல்விக்கு பிறகும், பாகிஸ்தான் ஒரு நாடக ராணியை போலவே செயல்பட்டது. தோல்வியை கூட வெற்றியாக கொண்டாடியது. ஆனால் மூன்று வாரங்களுக்குள் நிலைமை தலைகீழாக மாறியுள்ளது. அரசியல், இராணுவம் மற்றும் உள்நாட்டு பிரச்சினைகளால் பாகிஸ்தான் தற்போது பெரும் குழப்பத்தில் மூழ்கியுள்ளது.
சுய-பிரகடன தளபதி அசிம் முனீர் வெளிநாட்டு பயணங்களில் ஈடுபட்டு, தான் ஒருவர் தான் உண்மையான அதிகாரம் செலுத்துபவர் என்று வெளிக்காட்டி வருகிறார்.
ஷெபாஸ் ஷெரீஃப் தொலைக்காட்சியாக இருக்கலாம், ஆனால் அவர் தான் ரிமோட் கண்ட்ரோல் என்று முனீர் சொல்லாமல் சொல்கிறார். டொனால்ட் ட்ரம்ப்பின் ஆதரவு அவருக்கு ஒரு தவறான அதிகார உணர்வை அளித்துள்ளது. ஆனால் நிலைமைகள் மிக வேகமாக மாறுகின்றன.
பாகிஸ்தான், காபூல் மீது குண்டு வீசியதால், தலிபான் பதிலடி கொடுக்க முடிவெடுத்தது. “நீங்கள் வானத்திலிருந்து தாக்கினால், நாங்கள் நிலம் வழியாக நடப்போம்” என்று கூறிய தலிபான் படைகள், அவர்கள் ஒருபோதும் ஏற்காத டூராண்ட் எல்லையை தாண்டி பாகிஸ்தான் நிலைகள் மீது பெரும் தாக்குதலை தொடங்கின.
அமெரிக்கப் படைகள் ஆப்கானிஸ்தானில் விட்டு சென்ற ஹம்வி வாகனங்கள், பீரங்கிகள், ராக்கெட்டுகள் மற்றும் ஷெல்களை பயன்படுத்தித் தாக்குதல் நடத்தினர். சுமார் 10 பாகிஸ்தான் நிலைகள் கைப்பற்றப்பட்டன, குறைந்தது 15 வீரர்கள் பலியாகினர். பாகிஸ்தான் பதிலடியாக டிரோன்கள் மற்றும் டாங்கிகளை பயன்படுத்தியது, 19 ஆப்கானிய எல்லை சாவடிகளை கைப்பற்றியதாக கூறியது.
ஆப்கான் தலிபான், பாகிஸ்தானுக்கு எதிராக தெஹ்ரீக்-இ-தலிபான் பாகிஸ்தான் என்ற அமைப்பை பயன்படுத்துகிறது. மறுபுறம், பாகிஸ்தான், ஆப்கானிஸ்தானுக்கு எதிராக லஷ்கர்-இ-இஸ்லாமைக் என்ற அமைப்பை பயன்படுத்துவதாக சமீபத்திய செய்திகள் தெரிவிக்கின்றன.
தெஹ்ரீக்-இ-தலிபான் பாகிஸ்தான், பலூச் கிளர்ச்சியாளர்கள் மற்றும் ஆக்கிரமிப்பு காஷ்மீர் எல்லையில் தலிபான் தாக்குதலைத்தொடுக்கும்போது, பாகிஸ்தானுக்கு உள்ளே நிலைமை இன்னும் மோசமாக உள்ளது: ஊழல் நிறைந்த இராணுவ ஆட்சியை தூக்கியெறிந்து ஷரியத் சட்டத்தை நிலைநாட்ட TTP விரும்புகிறது. குறிப்பாக கைபர் பக்துன்க்வா மாகாணத்தில் கடந்த 18 மாதங்களில் 600-க்கும் மேற்பட்ட தாக்குதல்களை நடத்தி, ஆயிரத்திற்கும் மேற்பட்டவர்களைக் கொன்றுள்ளனர். சில நகரங்களில் TTP கிட்டத்தட்ட தங்களது சொந்தச் சட்டத்தை நடத்துகிறது.
ஒரு வருடத்திற்குள் 300-க்கும் மேற்பட்ட தாக்குதல்களை நடத்தி, பாகிஸ்தான் வீரர்கள் உட்பட 545-க்கும் மேற்பட்டோரை பலூச் கிளர்ச்சியாளர்கள் கொன்றுள்ளனர். இவர்களின் தாக்குதல்கள் பெரும்பாலும் பலூசிஸ்தானில் உள்ள சீன திட்டங்களை இலக்காக கொண்டுள்ளன. பலூச் கிளர்ச்சியாளர்கள் தங்கள் நிலத்தை சுரண்டுவதாக சீனாவை பார்க்கிறார்கள்.
காஷ்மீர் பற்றி வாய் கிழிய பாகிஸ்தான் பேசினாலும், அது ஆக்கிரமித்துள்ள சிறிய பகுதியான POK-ஐ கூட கட்டுப்படுத்த முடியவில்லை. மின் கட்டண உயர்வு, கோதுமை மற்றும் அத்தியாவசிய பொருட்களின் விலை உயர்வு ஆகியவற்றால் மக்கள் சோர்வடைந்துள்ளனர். செப்டம்பர் 29 அன்று, அடிப்படை உரிமைகளுக்காக ஆயிரக்கணக்கான மக்கள் தெருவில் இறங்கி போராடினர். அரசு அலுவலகங்கள் எரிக்கப்பட்டு, காவல்துறையினருடன் மோதல் நடந்தது. இதில் குறைந்தது 12 பேர் பாகிஸ்தான் படையினரின் துப்பாக்கி சூட்டில் கொல்லப்பட்டனர். மக்கள் இஸ்லாமாபாத்தின் ஆட்சிக்கு எதிராக தாங்களாகவே கொந்தளித்து வருகின்றனர்.
இம்ரான் கான் ஆதரவாளர்களின் தொடர்ச்சியான போராட்டங்கள், காசா திட்டத்தில் இணைந்ததற்காக அரசாங்கத்தின் மீதான ஆத்திரம் என பாகிஸ்தான் இன்று அனைத்து பக்கங்களிலிருந்தும் எரிந்து கொண்டிருக்கிறது.
பாகிஸ்தான் எப்போதும் இல்லாத அளவுக்கு இன்று மிகவும் பலவீனமாக உள்ளது. மேற்கில் தலிபான், உள்ளே TTP மற்றும் பலூச் கிளர்ச்சியாளர்கள், மேலும் POK-யில் உள்நாட்டு கொந்தளிப்பு. ஒரு நாடு பல முனைகளில், அதுவும் உள்ளிருந்தே சண்டையிடும்போது, அதன் கவனம் மற்றும் பதிலளிக்கும் திறன் கடுமையாகக் குறைகிறது.
இந்த தருணம் தான், பாகிஸ்தான் ஆக்கிரமிப்பு காஷ்மீரை மீட்டெடுக்க இந்தியாவுக்கு சிறந்த வாய்ப்பாக அமையும் என்று பல ஆய்வாளர்கள் வாதிடுகின்றனர். பாகிஸ்தான் இராணுவத்தில் சுமார் 6 லட்சம் வீரர்கள் இருக்கலாம், ஆனால் மூன்று முனைகளில் ஒரே நேரத்தில் சண்டையிடுவது இராணுவ வளங்களை சிதறடிக்கும். ஆப்கான் எல்லையை பாதுகாக்கவே 2-3 லட்சம் துருப்புக்கள் தேவைப்படும் நிலையில், POK மற்றும் பலூசிஸ்தானில் பாதுகாப்பை வலுப்படுத்துவது பாகிஸ்தானுக்கு சாத்தியமற்றது.
இந்தியாவின் பாதுகாப்பு அமைச்சர் திரு. ராஜ்நாத் சிங் சமீபத்தில் கூறியது போல்: “POK-ஐ திரும்ப பெற பாகிஸ்தானுடன் போர் செய்ய வேண்டியதில்லை. POK எங்களுடையது. அது எங்களுடையதாக இருக்கும். ஆனால், POK மக்கள் அன்புடன் தங்கள் தாய்நாட்டுடன் இணைவார்கள்” என்பதே இந்தியாவின் நிலைப்பாடு.
எனவே, இந்தியா ஒரு முழு அளவிலான போரில் இறங்காமல், ரகசியமான அல்லது வரையறுக்கப்பட்ட இராணுவ நடவடிக்கைகளை மேற்கொள்வதற்கு இது சரியான நேரமாக இருக்கலாம். பாகிஸ்தானின் பலவீனத்தை பயன்படுத்தி, முக்கிய அச்சுறுத்தல்களை அமைதியாக அகற்றுவதும், ராஜதந்திர நகர்வுகளை மேற்கொள்வதும் புத்திசாலித்தனம்.
பாகிஸ்தான் ஆக்கிரமிப்பு காஷ்மீர் மக்களும் பாகிஸ்தான் ஆட்சியின் மீது கோபத்தில் இருப்பதால், இத்தகைய நகர்வுக்கு தார்மீக மற்றும் மனிதாபிமான அடிப்படையிலான ஒரு நியாயம் இந்தியாவுக்குக் கிடைக்கிறது.
ஒருபுறம் ஆப்கானிஸ்தான், மறுபுறம் இந்தியா என சிக்குண்டு நொறுங்கும் பாகிஸ்தான் மீண்டெழுந்து உயிர் பிழைக்குமா? இந்த சூழ்நிலையில் இந்தியா என்ன செய்யும் என்பதை பொறுத்திருந்து பார்ப்போம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
Author: Bala Siva
