मुंबई : आयवेअर कंपनी लेन्सकार्ट सोल्युशन्सच्या आयपीओला गुंतवणूकदारांकडून जोरदार प्रतिसाद मिळाला. तीन दिवसात आयपीओ २८.२६ पट सबस्क्राइब झाला. मात्र, लिस्टिंगपूर्वी कंपनीचा ग्रे मार्केट प्रीमियम (जीएमपी) ७५-८० रुपयांवरून निम्म्याने ३८-४० रुपयांपर्यंत कमी झाला. यामुळे गुंतवणूकदारांना लिस्टिंगला १० टक्क्यांपेक्षा कमी परतावा मिळण्याची शक्यता आहे.



मोठा प्रतिसाद

गुंतवणूकदारांनी Lenskart IPO मध्ये उत्साहाने भाग घेतला. कंपनीला ३२.५६ लाखांहून अधिक अर्ज मिळाले, ज्यामुळे एकूण बोली मूल्य अंदाजे १.१३ लाख कोटी रुपये झाले. पात्र संस्थात्मक खरेदीदारांकडून (क्यूआयबी) कंपनीला सर्वाधिक ४०.३५ पट बोली मिळाला. नॉन-इन्स्टिट्यूशनल इन्व्हेस्टर्स (एनआयआय) श्रेणी १८.२३ पट सबस्क्राइब झाली. किरकोळ गुंतवणूकदार श्रेणी ७.५४ पट आणि कर्मचारी श्रेणी ४.९६ पट भरली.



किंमत बँड

Lenskart IPO ३१ ऑक्टोबर ते ४ नोव्हेंबर पर्यंत खुला होता. कंपनीने शेअर्सची किंमत ३८२ रुपये ते ४०२ रुपये प्रति शेअर अशी ठेवली होती. गुंतवणूकदार किमान ३७ शेअर्सच्या पटीत बोली लावू शकत होते. या आयपीओद्वारे कंपनीने एकूण₹७,२७८ कोटी उभारले. यामध्ये २,१५० कोटीं रुपयांचे नवीन शेअर्स आणि आॅफर फाॅर सेलमध्ये ५,१२८ कोटींचे शेअर्स विकले गेले.



वाटप आणि लिस्टिंग तारीख

लेन्सकार्टच्या आयपीओमध्ये शेअर्सचे वाटप गुरुवार, ६ नोव्हेंबर २०२५ रोजी अंतिम केले जाईल. त्यानंतर कंपनीचे शेअर्स सोमवार, १० नोव्हेंबर रोजी बीएसई आणि एनएसईसवर सूचीबद्ध केले जातील.



ब्रोकरेज फर्म्सचे मत

लेन्सकार्टच्या आयपीओवर ब्रोकरेज फर्म्सनी मिश्रित मते व्यक्त केली आहेत. काही विश्लेषकांचा असा विश्वास आहे की कंपनीचे मजबूत ब्रँड मूल्य आणि वाढत्या बाजारपेठेतील वाटा पाहता दीर्घकालीन गुंतवणुकीसाठी हा एक चांगला पर्याय असू शकतो.मात्र इतरांनी सध्याच्या मूल्यांकनाबाबत सावधगिरी बाळगण्याचा सल्ला दिला आहे.