Angar NagarPanchayat : अनगर नगरपंचायत नगराध्यक्षपदाच्या निवडणुकीत राष्ट्रवादी काँग्रेसच्या उमेदवार उज्ज्वला थिटे यांचा अर्ज बाद होताच माजी आमदार राजन पाटील आणि त्यांच्या कुटुंबियांच्या वतीने मोठा जल्लोष करण्यात आला होता. या जल्लोषामध्ये राजन पाटील यांचे चिरंजीव बाळराजे पाटील यांनी उपमुख्यमंत्री अजित पवार यांना आव्हान दिले होते. बोट दाखवून एकेरी उल्लेख करून कोणाचाही नाद करा, पण अनगरकरांचा नाही, अशा शब्दात अजितदादांना ललकारले होते.

यावरून राजन पाटील आणि बाळाराजे पाटील यांच्यावर मोठ्या प्रमाणात टीका झाली होती. पण या टीकेनंतर राजन पाटील यांनी माध्यमांसमोर येऊन अजित पवार आणि पवार कुटुंबियांची माफी मागितली आहे. बाळराजे लहान आहेत, त्याला मुलगा समजून माफ करा, पदरात घ्या, अशा शब्दात राजन पाटील यांनी माफीनामा दिला आहे.

काय म्हणाले राजन पाटील?

आमच्या गावामध्ये कधीही निवडणूक झाली नाही. यावेळी ती झाली, त्यात तरुण मुलं उत्साहात असतात. हा उत्साह तरुणांनी साजरा करण्याचा प्रयत्न केला. त्यावेळी आमच्या मुलानं तिथं जे काही वक्तव्य केलं मी त्याचं समर्थन करणार नाही. राजकारणाच्या दृष्टीने तो लहान आहे. त्यामुळे त्यांच्या तोंडून नकळत अशा प्रकारचं वक्तव्य गेलं असल्याने त्याचा वडील म्हणून पाटील परिवाराच्या वतीने मी पवारांच्या कुटुंबियांची दिलगिरी व्यक्त करतो, क्षमा मागतो.

आज जरी मी मोठ्या पवार साहेबांपासून, अजितदादांपासून दूर गेलो असलो तरी त्यासाठी अजितदादा करणीभूत आहेत, असं मी समजणार नाही. त्याला अनेक कारणं आहेत. तरीसुद्धा मी त्यांचं नेतृत्व मान्य केलं होतं. आतापर्यंत जे वैभव उभं करण्यात आलंय त्यात मोठ्या साहेबांचा, अजित दादांचा सिंहाचा वाटा आहे. आमच्या मुलाच्या तोंडून नकळत, उत्साहात, भावनेत जे अपशब्द आले ते यत्किंचितही व्हायला नको होते. त्याबद्दल मी अजितदादांचं व्यक्तीशः आणि पवार परिवाराची मी अंत:करणपूर्वक दिलगिरी व्यक्त करतो, मोठ्या साहेबांच्या चरणी नतमस्तक होतो.

राष्ट्रवादीचे नेत्यांना राग येणे स्वाभाविक आहे, पण मी त्यांनाही विनंती करतो की, आपलाही एखादा मुलागा असेल आणि तो चुकला तर त्याला आपण पदरात घ्यायचं असतं. अजितदादांनीही पार्थ प्रमाणेच त्याला समजावं आणि त्याला पदरात घ्यावं असं मी विनंती करतो. लहान मुलाने जर मांडीवर घाण केली तर आई मांडी कापत नसते. त्याप्रमाणे हा विषयही मोठ्या मनाने संपवून टाकावा, अशी मी विनंती करतो.