चिकन हा आजच्या काळात सर्वाधिक खाल्ला जाणारा मांसाहारी पदार्थ मानला जातो. जिम करणारे तरुण असोत, वजन कमी करणारे असोत किंवा सुट्टीच्या दिवशी खास बेत करणारी कुटुंबे असोत, चिकन जवळपास प्रत्येकाच्या आवडीचं आहे. प्रथिनांनी समृद्ध असल्यामुळे चिकन आरोग्यासाठी चांगलं मानलं जातं. मात्र, चिकनचे सर्वच भाग शरीरासाठी तितकेच सुरक्षित असतात, असं नाही.
अनेकांना माहिती नसते की चिकनच्या काही विशिष्ट भागांमध्ये जास्त प्रमाणात चरबी, घातक घटक आणि सूक्ष्मजंतू असू शकतात. हे भाग नियमित खाल्ले गेले, तर हळूहळू शरीरावर त्याचे दुष्परिणाम दिसू लागतात. विशेषतः हृदय, पचनसंस्था आणि एकूण आरोग्यावर त्याचा परिणाम होऊ शकतो. त्यामुळे चिकन खाताना कोणते भाग टाळावेत, हे जाणून घेणं गरजेचं आहे.
चिकनचे फुफ्फुस का धोकादायक ठरतात?
चिकनच्या शरीरातील सर्वात संवेदनशील भागांपैकी एक म्हणजे फुफ्फुस. या भागात काही प्रकारचे जिवाणू आढळतात, जे खूप वेळ शिजवल्यानंतरही पूर्णपणे नष्ट होत नाहीत. हे जिवाणू शरीरात गेल्यास पोटदुखी, जुलाब, संसर्ग आणि अशक्तपणा यांसारख्या समस्या उद्भवू शकतात. त्यामुळे चिकन स्वच्छ करताना किंवा शिजवताना फुफ्फुसांचा भाग काढून टाकणं अधिक सुरक्षित ठरतं.
चिकनची मान खाणं कितपत योग्य?
अनेक जण चवीसाठी चिकनची मान खातात. मात्र, मानेच्या भागात शरीरातील घातक द्रव्ये साठवणाऱ्या ग्रंथी असतात. याच भागात कोंबडीला दिल्या जाणाऱ्या औषधांचे किंवा इंजेक्शनचे अंश राहण्याची शक्यता जास्त असते. दीर्घकाळ हा भाग खाल्ल्यास शरीरातील हार्मोन्सच्या संतुलनावर परिणाम होऊ शकतो.
चिकनचे पाय आरोग्यासाठी का टाळावेत?
चिकनचे पाय थेट जमिनीच्या संपर्कात येतात. त्यामुळे त्यावर जंतुसंसर्ग होण्याची शक्यता अधिक असते. कितीही स्वच्छता केली तरी काही सूक्ष्मजंतू राहू शकतात. शिवाय या भागात चरबीचं प्रमाण तुलनेने जास्त असल्यामुळे कोलेस्ट्रॉल वाढण्याचा धोका निर्माण होतो.
चिकनची शेपटी म्हणजे चरबीचा साठा
चिकनच्या शेपटीच्या भागात मोठ्या प्रमाणात फॅट आणि ग्रंथी असतात. हा भाग नियमित खाल्ल्यास शरीरातील वाईट कोलेस्ट्रॉल वाढू शकतं. हृदयविकार, लठ्ठपणा किंवा रक्तदाबाचा त्रास असणाऱ्यांसाठी हा भाग विशेषतः अपायकारक ठरू शकतो.
लिव्हर खाताना घ्यावी लागणारी काळजी
चिकन लिव्हरमध्ये काही पोषक घटक असले तरी तो शरीरातील विषारी द्रव्ये गाळण्याचं काम करतो. जर कोंबडीला जास्त प्रमाणात औषधे किंवा रसायने दिली गेली असतील, तर त्याचे अंश लिव्हरमध्ये साचलेले असू शकतात. त्यामुळे लिव्हर वारंवार आणि जास्त प्रमाणात खाणं टाळणं योग्य ठरतं.
चिकन खाताना लक्षात ठेवा या गोष्टी
चिकन नेहमी स्वच्छ पाण्यात नीट धुवून घ्यावं. शक्य असल्यास मीठ आणि हळदीचं पाणी वापरावं. चिकन पूर्णपणे शिजलेलं असणं अत्यंत महत्त्वाचं आहे. अर्धवट शिजलेलं चिकन खाल्ल्यास पचनाचे विकार होऊ शकतात. तेलकट आणि जास्त मसालेदार पदार्थांऐवजी साध्या पद्धतीने शिजवलेलं चिकन अधिक फायदेशीर ठरतं.
दरम्यान, चिकन खाणं चुकीचं नाही पण योग्य भाग निवडणं आणि मर्यादेत सेवन करणं गरजेचं आहे. चिकन ब्रेस्ट हा भाग प्रथिनांच्या दृष्टीने तुलनेने सुरक्षित आणि आरोग्यदायी मानला जातो.
