காரைக்கால்: புதுச்சேரி மாநிலம் காரைக்காலில் மத்திய உள்துறை அமைச்சர் அமித்ஷா பங்கேற்கும் பாரதிய ஜனதா கட்சியின் பிரம்மாண்ட பொதுக்கூட்டத்தில், பாதுகாப்பு காரணங்களை முன்னிட்டு கருப்பு நிற ஆடை மற்றும் பொருட்களைக் கொண்டு வந்தவர்களுக்குக் கடும் கட்டுப்பாடுகள் விதிக்கப்பட்டன. குறிப்பாக, கருப்பு துப்பட்டா அணிந்து வந்த பெண் ஒருவரை, அதனை அகற்றிய பிறகே கூட்டத்திற்குள் காவல்துறை அனுமதித்த சம்பவம் பெரும் பரபரப்பை ஏற்படுத்தியுள்ளது.
மத்திய உள்துறை அமைச்சர் அமித்ஷா, புதுச்சேரி மற்றும் காரைக்கால் பகுதிகளில் பல்வேறு நிகழ்வுகளில் பங்கேற்பதற்காகவும், கட்சியின் தேர்தல் வியூகங்கள் குறித்து ஆலோசனை நடத்துவதற்காகவும் இன்று காரைக்கால் வருகை தருகிறார். காரைக்கால் சந்தை திடலில் ஏற்பாடு செய்யப்பட்டிருந்த பிரம்மாண்ட பொதுக்கூட்டத்தில் அவர் உரையாற்ற உள்ளார்.
மத்திய அமைச்சரின் வருகையை முன்னிட்டு, காரைக்கால் மாவட்டம் முழுவதும் ஐந்தடுக்கு பாதுகாப்பு போடப்பட்டிருந்தது. புதுச்சேரி மாநில காவல்துறையினருடன் இணைந்து மத்திய பாதுகாப்பு படையினரும் பாதுகாப்பு பணியில் ஈடுபடுத்தப்பட்டனர். பொதுக்கூட்டம் நடைபெறும் சந்தை திடல் மற்றும் அதனைச் சுற்றியுள்ள பகுதிகள் காவல்துறையின் முழுமையான கட்டுப்பாட்டிற்குள் கொண்டு வரப்பட்டன.
பொதுக்கூட்டம் தொடங்குவதற்கு முன்னதாகவே, காரைக்கால் மற்றும் அதன் சுற்றுவட்டாரப் பகுதிகளில் இருந்து ஆயிரக்கணக்கான பாஜக தொண்டர்களும் பொதுமக்களும் மேடைக்கு முன்புள்ள பகுதியில் கூடத் தொடங்கினர். கூட்டத்திற்கு வருபவர்கள் அனைவரும் மெட்டல் டிடெக்டர் சோதனைக்குப் பிறகே உள்ளே அனுமதிக்கப்பட்டனர்.
அப்போது, கூட்டத்தில் பங்கேற்பதற்காக வந்த ஒரு சில பெண் தொண்டர் கருப்பு நிற துப்பட்டா அணிந்து வந்திருந்தனர். நுழைவு வாயிலில் பாதுகாப்பு பணியில் இருந்த பெண் காவலர்கள், அந்தப் பெண்களை சோதனை செய்தனர். அப்போது, பாதுகாப்பு நடைமுறைகளின்படி கருப்பு நிற துணிகள் மற்றும் பொருட்களுக்கு அனுமதி இல்லை எனக்கூறி, அந்தப் பெண்கள் அணிந்திருந்த துப்பட்டாவை கழற்றி வைத்துவிட்டுச் செல்லுமாறு அறிவுறுத்தினர்.
இதனால் அதிர்ச்சியடைந்த அந்தப் பெண்கள், இது தனது ஆடையின் ஒரு பகுதி என்றும், இதில் எந்த உள்நோக்கமும் இல்லை என்றும் கூறி காவல்துறையினருடன் சிறிது நேரம் வாக்குவாதத்தில் ஈடுபட்டார். இருப்பினும், மேலிடத்து உத்தரவு மற்றும் பாதுகாப்பு நெறிமுறைகளைச் சுட்டிக்காட்டிய காவல்துறை, துப்பட்டாவை அகற்றினால் மட்டுமே உள்ளே செல்ல முடியும் என்பதில் உறுதியாக இருந்தனர்.
வேறு வழியின்றி, அந்தப் பெண்கள் தான் அணிந்திருந்த கருப்பு துப்பட்டாவைக் கழற்றி காவல்துறையினரிடம் ஒப்படைத்தார். அதன் பின்னரே அவர்கள் பொதுக்கூட்ட அரங்குக்குள் செல்ல அனுமதிக்கப்பட்டார். இதேபோல, கூட்டத்திற்கு வந்த மேலும் சில ஆண்கள் அணிந்திருந்த கருப்பு நிற துண்டுகள், கைக்குட்டைகள் மற்றும் கறுப்பு நிற முகக்கவசங்களை (Masks) அகற்றுமாறு காவல்துறையினர் வலியுறுத்தினர்.
பல இடங்களில் தொண்டர்களுக்கும் காவல்துறையினருக்கும் இடையே சிறிய அளவில் சலசலப்பு ஏற்பட்டது. "கட்சியின் மீதான பற்றால் வந்த எங்களுக்கு இது போன்ற கட்டுப்பாடுகள் மனவருத்தத்தை தருகிறது" என்று சில தொண்டர்கள் முணுமுணுத்ததை காண முடிந்தது.
பொதுவாக விஐபி (VVIP) மற்றும் மத்திய அமைச்சர்கள் பங்கேற்கும் கூட்டங்களில், போராட்டக்காரர்கள் கருப்பு கொடி காட்டி எதிர்ப்பு தெரிவிப்பதைத் தவிர்க்க இத்தகைய கட்டுப்பாடுகள் விதிக்கப்படுவது வழக்கம். "பாதுகாப்பு அச்சுறுத்தல்கள் மற்றும் போராட்டங்களைத் தவிர்க்கும் நோக்கில், முன்னெச்சரிக்கை நடவடிக்கையாக கருப்பு நிற பொருட்களுக்குத் தடை விதிக்கப்பட்டது. இது வழக்கமான பாதுகாப்பு நடைமுறைதான்," என்று பாதுகாப்பு பணியில் இருந்த உயர் அதிகாரி ஒருவர் தெரிவித்தார்.
பாஜக கூட்டத்தில் தொண்டர்களுக்கே இத்தகைய கட்டுப்பாடுகள் விதிக்கப்பட்டது காரைக்கால் அரசியல் வட்டாரத்தில் பேசுபொருளாகியுள்ளது. எதிர்த்தரப்பினர் இதனை விமர்சித்து வரும் நிலையில், அசம்பாவிதங்கள் ஏதுமின்றி கூட்டத்தை நடத்தி முடிக்கவே இத்தகைய கடுமையான நடவடிக்கைகள் எடுக்கப்பட்டதாக பாஜக நிர்வாகிகள் தரப்பில் விளக்கம் அளிக்கப்பட்டுள்ளது. பாதுகாப்பு கெடுபிடிகளையும் மீறி பல்லாயிரக்கணக்கான மக்கள் திரண்டிருந்தது காரைக்காலில் பாஜகவின் பலத்தைக் காட்டுவதாக அமைந்தது.
