धानोरा : अंबाजोगाई तालुक्यातील माकेगाव येथील प्रगतशील शेतकरी जयसिंगराव देशमुख यांचा पुत्र अजित देशमुख यांची महाराष्ट्र लोकसेवा आयोगाच्या परीक्षेतून पोलिस उपनिरीक्षकपदी निवड झाली आहे.

माकेगावातून पहिल्यांदाच पोलिस उपनिरीक्षक होण्याचा मान त्याने मिळवल्याने संपूर्ण तालुक्यात कौतुक होत आहे. या यशाबद्दल गावकऱ्यांनी छत्रपती शिवाजी महाराज चौकात फटाक्यांची आतषबाजी करत आणि पेढे वाटून आनंद साजरा केला.

अजितच्या या कामगिरीमुळे आई-वडिलांचे स्वप्न पूर्ण झाले असून, सर्व स्तरांतून त्याच्यावर अभिनंदनाचा वर्षाव होत आहे.

अजित यांचे प्राथमिक शिक्षण गावातील जिल्हा परिषद शाळा येथे, माध्यमिक शिक्षण ममदापूर येथील संभाजीराव बडगिरे महाविद्यालयात तर पदवीचे शिक्षण लातूर येथे झाले आहे.