पण, प्रसिद्ध कृष्णाने ही जोडी तोडली आणि निसंका २४ चेंडूंत ४१ धावांवर झेलबाद झाला. त्याने ६ चौकार व १ षटकार खेचला होता. त्यानंतर राशीद खानने सलग दोन विकेट्स घेत दिल्लीला बॅकफूटवर फेकले. नितीश राणा ( ५) व समीर रिझवी ( ०) हे स्वस्तात माघारी परतले. राशीदने ट्वेंटी-२०त ७०७ विकेट्स घेतल्या आहेत आणि तो सध्या सर्वाधिक विकेट घेणारा गोलंदाज आहे. दिल्लीसाठी राहुल मैदानावर उभा राहिला आणि शेवटच्या ५ षटकांत ६९ धावांची गरज असताना त्याच्यावर सर्व भीस्त होती. KL Rahul शतकाच्या दिशेने कूच करत असताना त्याच्यासमोर संघाला विजय मिळवून देण्याचे ध्येय होते.

मात्र, त्रिस्तान स्तब्स ( ७) रन आऊट झाल्याने दिल्लीवरील दडपण वाढत चाललेले. रिटायर्ड हर्ट झालेला डेव्हिड मिलर पुन्हा फलंदाजीला आला. मोहम्मद सिराजने टाकलेल्या १७व्या षटकात सामन्याला कलाटणी मिळाली. स्तब्स रन आऊट झाला आणि नंतर शेवटच्या चेंडूवर राहुल झेलबाद झाला. बाहेरच्या दिशेने जाणाऱ्या चेंडूवर फटका मारण्याचा त्याचा प्रयत्न फसला आणि बॅटची किनार लागत चेंडू यष्टिरक्षकाच्या हाती विसावला. राहुल ५२ चेंडूंत ११ चौकार व ४ षटकारांसह ९२ धावांवर बाद झाला. दिल्लीला अजून १८ चेंडूंत ४५ धावा हव्या होत्या.

डेव्हिड मिलर उभा राहिला आणि त्याने विपराज निगमसह १४ चेंडूंत ३६ धावांची भागीदारी केली. १९व्या षटकात मोहम्मद सिराजच्या गोलंदाजीवर दोघांनी २३ धावा कुटल्या. पण, तरीही सामना अटीतटीचा झाला. ६ चेंडूंत १३ धावा हव्या असताना विपराज चौकार मारून बाद झाला आणि त्यानंतर ३ चेंडू ८ धावा असा सामना आणला. मिलरने षटकार खेचला खरा, परंतु २ चेंडू २ धावा हव्या असताना मिलरने एक धाव नाकारली. त्यामुळे १ चेंडू २ धावा अशी मॅच आली. प्रसिद्धने चतुराईने चेंडू टाकला आणि मिलरने तो मिस केला.. तितक्याच यष्टिरक्षक जॉस बटलरने थ्रो करून कुलदीपला रन आऊट केले आणि मॅच जिंकली.