वैभवच्या विकेटनंतर ध्रुवने मोर्चा सांभाळताना ४३ चेंडूंत ८ चौकार व ३ षटकारांसह ८१ धावांची नाबाद खेळी केली. कृणाल पांड्या व जोश हेझलवूड यांनी प्रत्येकी दोन विकेट्स घेत RCB ला सामन्यात पुनरागमन करून देण्याचा प्रयत्न केला. पण, ध्रुव व रवींद्र जडेजा ही जोडी मैदानावर उभी राहिली. जड्डूने २४ धावांची खेळी केली. राजस्थानने १८ षटकांत ४ बाद २०२ धावा केल्या. दोनशेहून अधिक धावांच्या लक्ष्याचा यशस्वी बचाव करण्यात RCB ला सातवेळा अपयश आले. RR ने पाचव्यांदा दोनशेहून अधिक धावांच्या लक्ष्याचा पाठलाग केला आहे.

२०१५ मध्ये सलग पाच विजय आणि २०२४ मध्ये सलग चार विजय मिळवल्यानंतर, राजस्थान रॉयल्सने तिसऱ्यांदा आपल्या आयपीएल हंगामाची सुरुवात सलग चार किंवा अधिक विजयांनी केली आहे. २०२४ मध्ये ईडन गार्डन्सवर केकेआरकडून पराभव पत्करल्यानंतर, गट सामन्यातील प्रतिस्पर्ध्याच्या मैदानावर खेळलेल्या सामन्यातील आरसीबीचा हा पहिलाच पराभव आहे.