जगभरात चोरीच्या विविध घटना ऐकायला मिळतात. दागिने, गाड्या किंवा इतर मौल्यवान वस्तू. मात्र पश्चिम आफ्रिकेतील नायजर या देशात राहणारी वोडाबे ही खानाबदोश जमात आपल्या वेगळ्या आणि अनोख्या परंपरांमुळे विशेष चर्चेत असते.

या जमातीत दरवर्षी ‘Gerewol Festival’ नावाचा उत्सव साजरा केला जातो. हा केवळ सण नसून एक प्रकारची सौंदर्य आणि प्रेम-निवडीची परंपरागत स्पर्धा मानली जाते.

या उत्सवात पुरुष स्वतःला आकर्षक दाखवण्यासाठी तासन्‌तास रंगीबेरंगी मेकअप करतात, पारंपरिक पोशाख परिधान करतात आणि गाणे-नृत्य सादर करतात. त्यांच्या चेहऱ्यावरील हावभाव, उंची, शरीरयष्टी आणि नृत्यकौशल्य यावर महिलांचे लक्ष केंद्रित होते.

या परंपरेतील सर्वात वैशिष्ट्यपूर्ण बाब म्हणजे महिलांना आपल्या पसंतीचा जोडीदार निवडण्याचे पूर्ण स्वातंत्र्य दिले जाते. उत्सवादरम्यान एखाद्या महिलेला एखादा पुरुष आवडल्यास ती त्याला संकेत देते. त्यानंतर दोघे गुप्तपणे भेटतात.

जर दोघांमध्ये संबंध प्रस्थापित झाले तर त्या महिलेचे आधीचे लग्न आपोआप संपुष्टात येते आणि ती नव्या जोडीदारासोबत आयुष्य सुरू करते. या प्रक्रियेला जमातीत सामाजिक मान्यता आहे. विशेष म्हणजे, महिलेच्या आधीच्या पतीला या निर्णयाला विरोध करण्याचा अधिकार नसतो. ही परंपरा वोडाबे समाजातील महिलांच्या स्वातंत्र्याचे आणि त्यांच्या निर्णयक्षमतेचे प्रतीक मानली जाते.