पाकिस्तानातील लाहोर येथून एक मोठी आणि धक्कादायक बातमी समोर आली आहे. दहशतवादी संघटना लश्कर-ए-तैयबा (LeT)च्या संस्थापक सदस्यांपैकी एक असलेल्या अमीर हमजा याच्यावर हल्ला झाला आहे. अज्ञात हल्लेखोरांनी एका न्यूज चॅनेलच्या कार्यालयाबाहेर त्याच्यावर गोळीबार केला. या हल्ल्यात अमीर हमजा गंभीररित्या जखमी झाला असून, त्याला तातडीने रुग्णालयात दाखल करण्यात आले आहे. सध्या त्याची प्रकृती अत्यंत नाजूक असल्याचे सांगण्यात येत आहे.

सूत्रांच्या मते, हल्लेखोरांनी अचानक गोळीबार सुरू केला, त्यामुळे परिसरात मोठी खळबळ माजली. हल्ल्यामागे कोणाचा हात आहे, हे अद्याप स्पष्ट झालेले नाही. मात्र पाकिस्तानच्या सुरक्षा यंत्रणा या प्रकरणाची चौकशी करण्यात व्यस्त आहेत. पाकिस्तानमध्ये घुसून लष्कर-ए-तैयबाच्या म्होरक्यावर गोळीबार झाल्यामुळे जगभरात चर्चा सुरु आहे.

अमीर हमजा कोण आहे?

अमीर हमजा हा लश्कर-ए-तैयबा संघटनेच्या सुरुवातीच्या आणि महत्त्वाच्या चेहऱ्यांपैकी एक होता. त्याने कुख्यात आतंकवादी हाफिज सईद याच्यासोबत मिळून या संघटनेची स्थापना केली होती. तो केवळ संघटनेचा वैचारिक प्रचार प्रमुख नव्हता, तर फंडिंग, नवीन सदस्यांची भरती आणि आतंकवादी नेटवर्क मजबूत करण्यातही त्याची महत्त्वाची भूमिका होती.

रिपोर्ट्सनुसार, तो अफगाण मुजाहिदीनचा देखील भाग राहिला आहे. भडकाऊ भाषण आणि कट्टरपंथी लेखन यासाठी तो प्रसिद्ध होता. तो लश्करची मासिक पत्रिका ‘मजल्लह अल-दावा’ चा संपादकही होता. वर्ष २००२ मध्ये त्याने ‘काफिला दावत और शहादत’ या नावाचे पुस्तक लिहिली होते, ज्यात दहशतवादी विचारसरणीला प्रोत्साहन दिले गेले होते.

अमेरिकेने घोषित केले होते दहशतवादी

अमेरिकेच्या ट्रेझरी विभागाने लश्कर-ए-तैयबा या संघटनेची दहशतवादी संघटना म्हणून घोषणा केली असून, अमीर हमजाला आंतरराष्ट्रीय स्तरावर प्रतिबंधित दहशतवाद्यांच्या यादीत समाविष्ट केले आहे. वर्ष 2018 मध्ये पाकिस्तानमध्ये लश्करशी संबंधित संघटनांवर कारवाई झाल्यानंतर त्याने स्वतःला वेगळे दाखवण्याचा प्रयत्न केला होता. मात्र नंतर त्याने ‘जैश-ए-मनकाफा’ नावाने एक नवीन संघटना स्थापन केली, जी कथितरित्या जम्मू-काश्मीरसह अनेक भागांमध्ये सक्रिय होती. रिपोर्ट्सनुसार, अमीर हमजाचे नाव भारतातील अनेक दहशतवादी हल्ले आणि कट-कारस्थानांशी जोडले गेले आहे. तो दीर्घकाळ दहशतवादीच्या नेटवर्कचा महत्त्वाचा हिस्सा राहिला होता.