महागाई वाढली | पेट्रोल आणि डिझेलच्या दरात वाढ झाल्यानंतर आता सर्वसामान्य नागरिकांना पुन्हा एकदा महागाईचा फटका बसण्याची शक्यता आहे. दैनंदिन जीवनात वापरल्या जाणाऱ्या साबण, सोडा, डिटर्जंट, स्वयंपाकाचे तेल आणि इतर घरगुती वस्तूंच्या किमती वाढण्याची चिन्हे दिसत आहेत. जागतिक स्तरावर निर्माण झालेल्या तणावपूर्ण परिस्थितीचा परिणाम थेट सर्वसामान्य नागरिकांच्या खिशावर होण्याची शक्यता आता व्यक्त केली जात आहे.

इराण आणि अमेरिका यांच्यातील वाढता तणाव, कच्च्या तेलाच्या किमतीत झालेली वाढ आणि दुसरीकडे रुपयाचे अवमूल्यन यामुळे उत्पादन क्षेत्रावर मोठा ताण पडला आहे. याचा आता थेट परिणाम FMCG क्षेत्रावर होत असून, कंपन्यांच्या खर्चात वाढ होत आहे. त्यामुळे लवकरच ग्राहकांना दैनंदिन वस्तूंसाठी जास्त पैसे मोजावे लागतील. महागाई वाढली

अहवालानुसार, FMCG कंपन्या त्यांच्या उत्पादनांच्या किमती FY2027 च्या पहिल्या तिमाहीपासून 3 ते 4 टक्क्यांनी वाढवणार आहेत. उत्पादन खर्चात सातत्याने वाढ होत असल्याने कंपन्यांपुढे दरवाढ करण्याशिवाय पर्याय नसल्याचे बोलले जात आहे.

सध्या अनेक कंपन्यांकडे ३० ते ४५ दिवसांचा कच्चा माल आणि तयार मालाचा साठा उपलब्ध आहे. त्यामुळे तात्काळ दरवाढीची शक्यता कमी असली तरी येत्या काही महिन्यांत बाजारात वस्तूंच्या किमतीत बदल होण्याची शक्यता आहे. याचा अर्थ ग्राहकांना सध्या काहीसा दिलासा मिळाला असला तरी भविष्यात महागाईचा फटका बसू शकतो. महागाई वाढली

कच्च्या तेलाचे दर प्रति बॅरल 100 डॉलरच्या आसपास पोहोचल्याचे सांगितले जात आहे. यामुळे पॅकेजिंगमध्ये वापरल्या जाणाऱ्या पॉलिप्रॉपिलीन आणि पॉलिथिलीनसारख्या पेट्रोकेमिकल उत्पादनांच्या किमती वाढल्या आहेत. FMCG कंपन्यांच्या एकूण खर्चापैकी 15 ते 20 टक्के खर्च पॅकेजिंगवर होतो. त्यामुळे महागड्या पॅकेजिंगमुळे उत्पादनांच्या अंतिम किमती वाढणे स्वाभाविक मानले जाते.

पेंट्स, खाद्यतेल, साबण, डिटर्जंट्स आणि घरगुती साफसफाईची उत्पादने तयार करणाऱ्या कंपन्या विशेषतः दबावाखाली आहेत. त्यामुळे या वस्तूंच्या किमती इतर उत्पादनांपेक्षा अधिक वाढण्याची शक्यता आहे.

याचा सर्वाधिक परिणाम मध्यमवर्गीय आणि सामान्य कुटुंबांच्या मासिक बजेटवर होऊ शकतो. आधीच पेट्रोल-डिझेलच्या वाढत्या किमतींमुळे वाहतूक खर्च वाढला आहे. शिवाय, आता घरगुती वस्तू महाग झाल्या, तर खर्चाचा हिशोब पुन्हा बिघडू शकतो. महागाई वाढली

एकूणच, जागतिक तणाव, कच्च्या तेलाच्या वाढत्या किमती आणि चलन कमकुवत झाल्यामुळे देशात चलनवाढीचा दबाव पुनरुज्जीवित होताना दिसत आहे. मात्र, येत्या काळात बाजारात अनेक वस्तूंचे भाव वाढले तर त्याचा थेट परिणाम सर्वसामान्यांच्या खिशावर होणार हे निश्चित.