ठाणे जिल्ह्यातील शहापूर तालुक्यातील जांभूळवाड येथे आज सकाळी बिबट्याने एका महिलेर हल्ला केल्याची घटना घडली आहे. अरुणा घरत असं हलला झालेल्या महिलेचं नाव आहे. त्या किरकोळ जखमी झाल्या असून त्यांच्यावर शहापूर उपजिल्हा रुग्णालयात उपचार सुरू आहेत. पळसाची पाने तोडण्यासाठी जंगलात गेल्या असताना दबा धरून बसलेल्या बिबट्याने मागून झडप घातली. मात्र प्रसंगावधान राखत त्यांनी हातातील कोयत्याने प्रतिकार करून स्वतःचा जीव वाचवला. या झटापटीत त्यांच्या मानेवर व गुडघ्यावर जखमा झाल्या असून सध्या त्यांची प्रकृती स्थिर आहे. दरम्यान, काही दिवसांपूर्वी वाशाळा वनपरिक्षेत्रातील कळभोंडा येथे बिबट्याच्या हल्ल्यात कृष्णा भागवत अगीवले (वय 8) या मुलाचा दुर्दैवी मृत्यू झाला होता. आंबे पाडण्यासाठी गेलेल्या कृष्णावर बिबट्याने हल्ला करून त्याला जंगलात ओढून नेले होते. या घटनेनंतर गावकऱ्यांमध्ये तीव्र भीती निर्माण झाली आहे.सतत घडणाऱ्या या घटनांमुळे नागरिकांमध्ये भीतीचे वातावरण असून वनविभागाने बिबट्याचा बंदोबस्त करून गस्त वाढवावी, अशी मागणी स्थानिकांकडून जोर धरत आहे.

मुंबईच्या वाडिया हॉस्पिटलमधील शिकाऊ डॉक्टरांच्या हलगर्जीपणामुळे एका चार महिन्यांच्या बाळाचा मृत्यू झाल्याचा आरोप बाळाच्या आईने केलाय. याप्रकरणी डॉक्टरांवर कारवाईच्या मागणीसाठी बाळाच्या कुटुंबीयांनी 15 एप्रिल ला  भोईवाडा पोलिसांना तक्रारी अर्ज केला आहे त्याचप्रमाणे राष्ट्रपतींपासून ते पंतप्रधान, मुख्यमंत्री, आरोग्यमंत्री, पोलीस आयुक्त अशा सर्वांकडे पत्रव्यवहार केला असून आपल्या बाळाला न्याय मिळावा, अशी त्यांची मागणी आहे.