कल्याण जवळील खडवली नदी परिसरात तीन दिवसांपूर्वी सापडलेल्या बेवारस मृतदेहाचे गूढ अखेर उकलले आहे. अवघ्या ७०० रुपयांच्या चोरीच्या संशयातून एका मित्रानेच दुसऱ्या मित्राची दगडाने ठेचून निर्घृण हत्या केल्याची धक्कादायक माहिती उघडकीस आली आहे. टिटवाळा पोलिसांनी अत्यंत कौशल्याने तपास करीत, पोलीस श्वान आणि सुमारे ३०० सीसीटीव्ही कॅमेऱ्यांच्या मदतीने आरोपीला मुंबईतून बेड्या ठोकल्या आहेत.

कल्याण-टिटवाळा परिसरातील खडवली नदीकाठी तीन दिवसांपूर्वी एका अज्ञात व्यक्तीचा मृतदेह रक्ताच्या थारोळ्यात आढळला होता. या घटनेने परिसरात मोठी खळबळ माजली होती. मात्र, टिटवाळा पोलिसांनी तांत्रिक तपास आणि श्वान पथकाच्या मदतीने या गुन्ह्याचा छडा लावत आरोपी मित्राला अटक केली आहे.

मयत राजेश प्रभुळकर आणि आरोपी योगेश कदम हे दोघे मित्र असून एकत्र केटरर्सचे काम करायचे. घटनेच्या दिवशी दोघेही खडवली नदी परिसरात पोहण्यासाठी गेले होते. तिथे त्यांनी पार्टीही केली. यावेळी आपले ७०० रुपये राजेशने चोरले, असा संशय योगेशला आला. यावरून दोघांमध्ये जोरदार वाद झाला आणि रागाच्या भरात योगेशने जवळच असलेला दगड राजेशच्या डोक्यात घालून त्याची हत्या केली आणि तेथून पळ काढला.

सुरुवातीला मृताची ओळख पटवणे हे पोलिसांसमोर मोठे आव्हान होते. टिटवाळा पोलीस ठाण्याचे वरिष्ठ पोलीस निरीक्षक मुकेश ढगे, अधिकारी नितीन मुदगुन, महेश कदम आणि ठाणे एलसीबीच्या पथकाने तपास सुरू केला.श्वान पथकाची भूमिका: घटनास्थळी आणलेल्या पोलीस श्वानाने थेट खडवली रेल्वे स्थानकापर्यंतचा रस्ता दाखवला, ज्यामुळे तपासाला दिशा मिळाली.

पोलिसांनी खडवली ते मुंबई दरम्यानचे सुमारे ३०० सीसीटीव्ही फुटेज तपासले. यात आरोपीच्या संपर्कातील एक व्यक्ती पोलिसांना सापडली, ज्याच्या माध्यमातून मृताची आणि आरोपीची ओळख पटली.

पोलिसांनी दिलेल्या माहितीनुसार, अटक करण्यात आलेला आरोपी योगेश कदम हा सराईत गुन्हेगार आहे. राजेशच्या हत्येनंतर तो मुंबईतील एन. एम. जोशी मार्ग परिसरात मोबाईल चोरीच्या गुन्ह्यातही वाँटेड होता. विशेष म्हणजे, त्याच्यावर यापूर्वीही एका हत्येचा गुन्हा दाखल असल्याची प्राथमिक माहिती समोर आली आहे. सध्या टिटवाळा पोलिसांनी आरोपीला अटक केली असून, या प्रकरणाचा अधिक तपास पोलीस करत आहेत. अवघ्या काही रुपयांच्या वादातून झालेल्या या हत्येमुळे पुन्हा एकदा गुन्हेगारी प्रवृत्तीचा भयंकर चेहरा समोर आला आहे.