Sunrisers Hyderabad vs Punjab Kings Marathi Update: सलग दोन पराभवानंतरही पंजाब किंग्सच्या क्षेत्ररक्षणात काही सुधारणा दिसली नाही. सनरायझर्स हैदराबादविरुद्धच्या सामन्यात शशांक सिंग, कूपर कॉनली व ल्युकी फर्ग्युसन यांनी सोपे झेल टाकले आणि त्यात प्रभसिमनर सिंगनेही स्टम्पिंगची संधी गमावली. तीन जीवदान मिळालेल्या इशान किशनने ( Ishan Kishan) मग पंजाबच्या गोलंदाजांचे हाल केले. त्यात एक जीवदान मिळालेल्या हेनरिच क्लासननेही सातत्य राखताना वादळी अर्धशतक झळकावून ऑरेंज कॅप नावावर केली.

अभिषेक शर्माने १३ चेंडूंत २ चौकार व ४ षटकारांसह ३५ धावांची वादळी सुरुवात करून दिली. ट्रॅव्हिस हेड १९ चेंडूंत ३ चौकार व ३ षटकारांसह ३८ धावांवर माघारी परतला. त्यानंतर पंजाबच्या गोलंदाजांनी विकेटच्या संधी निर्माण केल्या होत्या. युझवेंद्र चहलच्या एकाच षटकात इशान किशनचा झेल सुटला अन् स्टम्पिंगची संधीही गमावली. मिळालेल्या संधीचं सोनं करताना इशानने ३२ चेंडूंत २ चौकार व ४ षटकारांसह ५५ धावा केल्या. सुर्यांश शेडगेने त्याचा झेल टिपला. इशान व क्लासन यांनी ४८ चेंडूंत ८८ धावांची केली.