विधानसभेच्या निवडणूक निकालानंतर आता तामिळनाडूमध्ये सत्ता स्थापनेसाठी आकड्यांची जुळवाजुळव करण्यास सुरुवात झाली आहे. या निवडणुकीत थलपती विजय यांच्या टीव्हीके पक्षाने डीएमके आणि एआयएडीएमके या दोन्ही पक्षांना मोठा धक्का दिला आहे. तामिळनाडूनमध्ये टीव्हीकेच्या सर्वाधिक 108 जागा निवडून आल्या आहेत. तामिळनाडूमध्ये सत्तास्थापनेसाठी बहुमताचा आकडा 118 एवढा आहे. परंतु हा जादुई आकडा गाठण्यात कोणत्याच पक्षाला यश न आल्यानं राज्यात सत्ता स्थापनेचा पेच वाढला आहे. टीव्हीकेला काँग्रेसने पाठिंबा दिला आहे. परंतु टीव्हीकेचे 108 आमदार आणि काँग्रेसचे 4 अशा 112 च आमदारांचं संख्याबळ सध्या टीव्हीकेकडे आहे. त्यांना सत्ता स्थापनेसाठी आणखी 6 आमदारांची गरज आहे.

दरम्यान आज थलपती विजय यांनी राज्यपालांची भेट घेऊन सत्तास्थापनेचा दावा केला आहे. टीव्हीके कडून राज्यपालांना 112 आमदारांच्या सह्यांचं पत्र देखील देण्यात आलं आहे. मात्र राज्यपालांनी टीव्हीकेला 118 आमदारांचं पत्र सादर करण्यास सांगितलं आहे. दरम्यान या सर्व घडामोडी घडत असताना आता तामिळनाडूमध्ये एआयएडीएमके आणि डीएमके युती करून सत्ता स्थापन करू शकतात अशी चर्चा सुरू झाली आहे. त्याचं महत्त्वाचं कारण म्हणजे थलपती विजय यांनी एआयएडीएमकेकडे पाठिंब्याची मागणी केली होती. मात्र एआयएडीएमकेने टीव्हीकेला पाठिंबा देण्यास नकार दिला आहे. याबाबत पक्षाकडून आपली भूमिका देखील स्पष्ट करण्यात आली आहे. आम्ही टीव्हीकेला पाठिंबा दिला, या बातम्यांमध्ये कोणंतही तथ्य नसल्याचं एआयएडीएमकेने म्हटलं आहे. त्यामुळे आता सर्वाधिक जागा येऊन देखील सत्ता स्थापन करण्यासाठी टीव्हीकेला तारेवरची कसरत करावी लागण्याची शक्यता आहे.

दुसरीकडे एआयएडीएमके आणि डीएमकेच्या आकडेवारीवर नजर टाकल्यास या निवडणुकीमध्ये एआयएडीएमकेला 47 जागा मिळाल्या आहेत, तर डीएमकेला 59 जागा मिळाल्या आहेत, दोन्ही पक्षांनी युती केली तर त्यांचं संख्याबळ 106 होतं, त्यांना बहुमतासाठी 12 आमदारांची आवशकता आहे. त्यामुळे त्यांना इतर पक्षांचा देखील पाठिंबा घ्यावा लागणार आहे. या सर्व घडामोडींच्या पार्श्वभूमीवर टीव्हीकेनं राज्यपालांकडे वेळ मागितल्याची माहिती समोर येत आहे. तर दुसरीकडे डीएमके आणि एआयएडीएमके युती करणार असल्याची देखील जोरदार चर्चा सुरू आहे. जर हे दोन्ही पक्ष एकत्र येऊन ते सत्ता स्थापन करण्यास यशस्वी झाले तर मात्र टीव्हीकेला विरोधी पक्षात बसण्याची वेळ येऊ शकते.