आयपीएल 2026 स्पर्धेत एकीकडे विक्रम रचले आहेत, तर दुसरीकडे वादही होत आहे. विक्रमांपेक्षा वादाची चर्चा सोशल मीडियावर जास्त होत असते. यंदाचं पर्वालाही वादाची किनार लाभली आहे. मग ड्रेसिंग रूममध्ये ई सिगारेट पिण्याचं प्रकरण असो की डगआऊटजवळ मोबाईलचा वापर असो की आणखी काही.. वादग्रस्त गोष्टींची चर्चा होत आहे. यात आता आणखी एक भर पडली आहे. आयपीएल खेळणाऱ्या खेळाडूंसोबत काही अज्ञात आणि बाहेरील व्यक्ती फिरत असल्याचं दिसून आलं आहे. टीम बस आणि संघाच्या खेळाडूंसोबत अज्ञात व्यक्तींचा वावर पाहायला मिळाल्याने बीसीसीआयने संताप व्यक्त केला आहे. इतर काही अनोळखी व्यक्ती खेळाडू थांबलेल्या हॉटेल्समध्येही भेट देत आहेत. त्यामुळे बीसीसीआयने आता कारवाईचा बडगा उचलण्याची तयारी केली आहे. बीसीसीआयचे सचिव देवजित सैकिया यांनी या वृत्ताला दुजोरा दिला आहे. सैकिया यांनी सर्व संघ आणि खेळाडूंना सूचना जारी करून आयपीएल नियमांचं पालन करण्याचं आव्हान केलं आहे. अन्यथा कठोर कारवाईचा इशारा दिला आहे.
बीसीसीआयचे सचिव देवजित सैकिया म्हणाले की, ‘आम्हाला असे समजले आहे की, काही संघ आणि खेळाडूंसोबत अज्ञात व्यक्ती फिरत आहेत. ते टीम बस आणि हॉटेलमध्येही प्रवेश करत आहेत. आम्ही सर्व फ्रँचायझी आणि खेळाडूंना एक सूचना जारी करू. त्याचे पालन न केल्यास, दोषी आढळलेल्यांवर कारवाई केली जाईल.’ सर्व आयपीएल खेळाडूंना केवळ टीम बसमधूनच प्रवास करणे बंधनकारक आहे आणि ते स्वतःची वाहने वापरू शकत नाहीत. कुटुंबातील सदस्य आणि मित्रांनाही टीम बसमध्ये चढण्यास मनाई आहे. हा नियम सुरक्षा राखण्यासाठी आणि भ्रष्टाचार रोखण्यासाठी लागू करण्यात आला आहे.
आयपीएल 2026 स्पर्धेच्या सुरूवातीपासून काही खेळाडू आपल्या गर्लफ्रेंडसोबत फिरताना दिसले आहेत. यात काही जण खेळाडूंसोबत टीमच्या बसमध्ये प्रवास करताना आढळून आले आहेत. तर काही जण हॉटेलमध्ये खेळाडूंसोबत फिरताना दिसले. देवजित सैकिया यांनी एएनआय या वृत्तसंस्थेला सांगितले की, काही संघ मालक आणि अधिकारी खेळाडूंसोबत अशा ठिकाणी जात आहेत, जिथे त्यांना जाण्यास सक्त मनाई आहे. थेट सामन्यांदरम्यान संघ मालकांना ड्रेसिंग रूममध्ये प्रवेश दिला जात नाही.
