Success Story : कधीकाळी महिलांना शिक्षणाचीही संधी नव्हती. महिलांना मूलभूत हक्कांसाठी तसेच शिक्षणासाठी झटावे लागायचे. परंतु आज संधी मिळताच आम्हाही कमी नाहीत, हे महिलांनी दाखवून दिले आहे. आजघडीला आपल्या आजूबाजूला अनेक यशस्वी महिला आहेत. काही महिलांनी तर स्वत:छे उद्योग उभारलेले आहेत. या महिला स्वबळावर आज कोट्यवधीचे साम्राज्य उभं करताना दिसत आहेत. सध्या अशाच एका हरहुन्नरी महिलेची चर्चा होत आहे. या महिलेने अवघ्या पाच हजार रुपयांच्या नोकरीला लाथ मारून स्वत:च्या कंपनीच्या रुपात कोट्यवधीची उलाढाल करणारं साम्राज्य उभं केला आहे. या महिलेचे यश हे कित्येक तरुण महिलांना प्रेरणादायी ठरत आहे.

या महिलेचे नाव आहे नयना वैद्य. त्यांना कधीकाळी फक्त पाच हजार रुपये पगार होता. आज त्यांनी 48 कोटी रुपयांचा व्यवसाय करणारी ‘ओम साई सर्जिकल्स’ (Om Sai Surgicals) नावाची एक कंपनी उभी केली आहे. ही एक हेल्थकेअर डिस्ट्रिब्यूशन करणारी कंपनी आहे. 1997 साली नयना वैद्य यांनी सुरुवातीला एका औषधं निर्माण करणाऱ्या कंपनीत सेल्स रिप्रझेंटिव्ह म्हणून कामाला सुरुवात केली. त्यावेळी त्यांचा पगार फक्त 5000 रुपये होता. त्यांनी फार्मसीचे शिक्षण घेतलेले आहे.

नयना वैद्य यांनी करोड क्लब नावाच्या पॉडकास्टमध्ये त्यांचा हा प्रवास सांगितलेला आहे. पुढे त्यांनी याच क्षेत्रात म्हणजेच औषध निर्माण करण्याच्या क्षेत्रात आपले करिअर करण्याचे ठरवले. त्यांनी पुढे ओम साई सर्जिकल्स नावाची एक कंपनी सुरू केली. या कंपनीतर्फे आरोग्यविषयक उपकरणांचे वितरण केले जाते. सुरुवातीच्या काळात त्यांना अनेक संकटं आली. परंतु या संकटांवर मात करून यशस्वी वाटचाल चालूच ठेवली. 2010 सालाच्या आसपास पहिल्यांदा त्यांच्या कंपनीची उलाढाल एक कोटीच्या घरात गेली.

त्यांनी या कंपनीची सुरुवात 2000 साली केली होती. कंपनी चालू केल्यानंतर पूर्ण एका दशकाने त्यांच्या कंपनीने कोटीची उलाढाल केली. त्यांना काही ठिकाणाहून भाडेदेखील मिळते. त्यांनी 2019 साली एक घर खरेदी करण्यासाठी एक होम लोन घेतले होते. याच घराची आजची किंमत 4 कोटी रुपये आहे. त्यांच्या या यशाची सगळीकडे चर्चा होत आहे.