आयपीएल 2026 स्पर्धेच्या अंतिम फेरीचा एक स्पर्धक क्वॉलिफायर 1 फेरीच्या निकालातून समोर येणार आहे. या सामन्यात रॉयल चॅलेंजर्स बंगळुरू आणि गुजरात टायटन्स हे संघ आमनेसामने येणार आहेत. धर्मशाळेत हिमाचल प्रदेश क्रिकेट असोसिएशन स्टेडियममध्ये हा सामना खेळला जाणार आहे. मंगळवारी संध्याकाळी 7 वाजता नाणेफेकीचा कौल होईल आणि साडे सात वाजता पहिला चेंडू टाकला जाईल. या सामन्यातील विजेत्या संघाला थेट अंतिम फेरीचं तिकीट मिळणार आहे. त्यामुळे या सामन्याचं महत्त्व वाढलं आहे. रॉयल चॅलेंजर्स बंगळुरू आणि गुजरात टायटन्स हे दोन्ही संघ तगडे आहेत. या दोन्ही संघांनी साखळी फेरीत चांगली कामगिरी केली आहे. त्यामुळे या सामन्यात काँटे की टक्कर पाहायला मिळणार हे नक्की आहे. दुसरीकडे, हा सामना 4 कारणांमुळे चर्चेत आला आहे. ही कारणं आकडे आणि धर्मशाळेतील मैदानाशी निगडीत आहेत.
आयपीएल 2026 स्पर्धेत क्वॉलिफायर 1 सामना धर्मशाळेतील हिमाचल प्रदेश क्रिकेट असोसिएशन स्टेडियममध्ये होत आहे. हे मैदान गुजरात टायटन्ससाठी अनोळखी आहे. कारण 2022 मध्ये स्पर्धेत भाग घेतल्यापासून गुजरात टायटन्स या मैदानावर पहिल्यांदा सामना खेळणार आहे. दुसरीकडे, आरसीबीने या पर्वात या मैदानावर एक सामना खेळला आहे. त्यात विजयही मिळवला आहे. या सामन्यात 222 धावांचं लक्ष्य पंजाब किंग्ससमोर ठेवलं होतं आणि 23 धावांनी हा सामना जिंकला.
आयपीएल स्पर्धेच्या इतिहासात रॉयल चॅलेंजर्स बंगळुरू आणि गुजरात टायटन्स आठ वेळा भिडले आहेत. या आठ सामन्यात दोन्ही संघांनी समान अर्थात 4-4 सामने जिंकले आहेत. पण हे सामने साखळी फेरीत झाले होते. त्यामुळे प्लेऑफमध्ये हे दोन्ही संघ पहिल्यांदाच भिडणार आहेत.
आयपीएल 2026 स्पर्धेच्या क्वॉलिफायर 1 मध्ये गुजरात टायटन्स आणि रॉयल चॅलेंजर्स बंगळुरू भिडणार आहेत. पण या सामन्यापूर्वी मागच्या तीन पर्वांची आकडेवारी महत्त्वाची आहे. 2023 पासून आतापर्यंत आरसीबी आणि गुजरात हे दोन्ही संघ यशस्वी ठरले आहेत. या दोन्ही संघांचा विजय आणि पराभवाचा आकडा एक सारखा आहे. दोन्ही संघांनी 34 सामन्यात विजय, त 24 सामन्यात पराभवाचं तोंड पाहिलं आहे.
क्वॉलिफायर 1 मध्ये रॉयल चॅलेंजर्स बंगळुरू आणि गुजरात टायटन्स यांना विजय आवश्यक आहे. कारण या सामन्यातील विजयी संघाला थेट अंतिम फेरीचं तिकीट मिळणार आहे. आतापर्यंत 18 पर्वापैकी 12 पर्वात क्वॉलिफायर 1 मधील विजेता संघ चॅम्पियन ठरला आहे. यात मागची सलग 8 पर्व आहेत. त्यामुळे ही आकडेवारी पाहता उत्सुकता शिगेला पोहोचली आहे.
