Odisha Vigilance Raid News : ओडिशामधून एक अतिशय धक्कादायक बातमी समोर आली आहे. ओडिशाच्या कंधमाल जिल्ह्यातील बालिगुडा येथील दक्षता विभागाने एकात्मिक आदिवासी विकास संस्थेचे (ITDA) सहाय्यक कार्यकारी अभियंता (AEE) बैकुंठ नाथ बेहरा यांच्याशी संबंधित नऊ ठिकाणांवर मोठी धाड टाकली. ओडिशाच्या बैकुंठ नाथ बेहरा यांच्यावर बेहिशेबी मालमत्ता बाळगल्याचा आरोप होता, ज्यामुळे बेहरा यांच्या सर्व ठिकाणांवर एकाच वेळी छापे टाकण्यात आले. या छाप्यांदरम्यान, ओडिशा दक्षता विभागाने (Vigilance Team of Odisha) बैकुंठ नाथ बेहरा यांच्या मालकीची कोट्यवधी रुपयांची मालमत्ता शोधून काढली आहे, ज्यामध्ये एक पाच मजली इमारत आणि 13 महागड्या भूखंडांचा समावेश आहे. याव्यतिरिक्त, दोन लॉकरमधून 2 कोटी रुपये रोकड आणि 300 ग्रॅमहून अधिक सोने जप्त करण्यात आले. (Odisha Vigilance raided)
दरम्यान, आरोपी बैकुंठ नाथ बेहरा यांच्या लॉकरमध्ये नोटांचे बंडल पाहून विभागाचे अधिकारी आश्चर्यचकित झाले. लॉकरमध्ये सापडलेली रोकड मोजण्यासाठी त्यांनी बँकेची रोकड मोजण्याची मशीन मागवली. सूत्रांनुसार, दोन्ही लॉकर इंजिनिअर बेहरा यांच्या पत्नीच्या नावावर नोंदणीकृत होते.
Odisha Vigilance Raid News : छाप्यात आतापर्यंत किती मालमत्ता जप्त?
ओडिशा दक्षता विभागाच्या छाप्यांमध्ये आतापर्यंत जप्त केलेल्या मालमत्तांमध्ये पाच इमारतींचा समावेश आहे: भुवनेश्वरमधील चार आलिशान इमारती, ज्यात नीलाद्री विहारमधील 10,500 चौरस फुटांची चार मजली इमारत, शैलश्री विहारमधील 1,100 चौरस फुटांची तीन मजली इमारत, कानन विहारमधील 3,750 चौरस फुटांची दोन मजली इमारत, चंद्रशेखरपूरमधील 2,500 चौरस फुटांची दोन मजली इमारत आणि जाजपूरच्या धर्मशाळा येथील वडिलोपार्जित जमिनीवरील 2,500 चौरस फुटांची दोन मजली इमारत यांचा समावेश आहे. याव्यतिरिक्त, 13 महागड्या भूखंडांमध्ये भुवनेश्वरच्या चंद्रशेखरपूर, शैलश्री विहार, घाटिकिया आणि बोमीखाल यांसारख्या प्रमुख भागांतील सात भूखंड, जाजपूर जिल्ह्यातील धर्मशाळा परिसरातील पाच भूखंड आणि बारीपाडा येथील एका भूखंडाचा समावेश आहे.
Odisha News : शेतजमिनीवरील खराब झालेला विजेचा खांब बदलून देण्यासाठी 15,000 रुपयांची लाच
दक्षता विभागाच्या (व्हिजिलन्स) नोंदींनुसार, बेहरा यांनी 1999 मध्ये नबरंगपूर ब्लॉकमध्ये कनिष्ठ अभियंता (स्थापत्य) म्हणून सरकारी सेवेत प्रवेश केला. त्यावेळी त्यांचे सुरुवातीचे मासिक वेतन 6,000 रुपये होते. त्यानंतर त्यांनी नबरंगपूर आणि उदाला येथील आयटीडीए (ITDA) व इतर सरकारी आस्थापनांमध्ये विविध पदांवर काम केले. ऑक्टोबर 2016 मध्ये त्यांची पदोन्नती होऊन ते आयटीडीए, नबरंगपूर येथे सहाय्यक अभियंता म्हणून रुजू झाले. त्यानंतर फेब्रुवारी 2026 मध्ये त्यांची पुन्हा पदोन्नती होऊन ते सहाय्यक कार्यकारी अभियंता बनले आणि सध्या ते आयटीडीए, बालीगुडा येथे कार्यरत आहेत. एका स्वतंत्र कारवाईत, दक्षता विभागाच्या पथकाने कटक जिल्ह्यातील नरसिंहपूर इलेक्ट्रिकल विभागातील (टीपीसीओडीएल - TPCODL अंतर्गत) 'लाइनमॅन-ए' असलेल्या धर्म निरंजन चौधरी यांना अटक केली. तक्रारदाराच्या शेतजमिनीवरील खराब झालेला विजेचा खांब बदलून देण्यासाठी 15,000 रुपयांची लाच मागितल्या आणि ती स्वीकारल्याच्या आरोपावरून चौधरी यांना पकडण्यात आले.
इतर महत्वाच्या बातम्या
