Chingri Malai Curry Fascinating Origin History: लोकप्रिय फूड गाईड TasteAtlas ने अलीकडेच जगातील सर्वोत्तम कोळंबी (श्रिंप) पदार्थांची यादी जाहीर केली आहे. या यादीत बंगालमधील सुप्रसिद्ध चिंग्री मलाई करीला 11 वा क्रमांक मिळाला आहे. नारळाच्या दुधात शिजवलेली कोळंबी, त्यात हळद, लाल तिखट, गरम मसाला यांसारख्या मसाल्यांचा वापर आणि त्याची वैशिष्ट्यपूर्ण चव यामुळे हा पदार्थ बंगाली खाद्यसंस्कृतीतील एक अत्यंत महत्त्वाचा घटक मानला जातो.

मात्र या पदार्थाची चव जितकी प्रसिद्ध आहे, तितकाच त्याच्या नावाचा इतिहासही चर्चेचा विषय ठरला आहे. अनेक वर्षांपासून एक प्रश्न विचारला जातो, की 'मलाई' हा शब्द दुधाच्या सायीवरून आला आहे की त्याचा संबंध मलेशियातील 'Malay' संस्कृतीशी आहे?

खाद्यलेखक आणि शेफ सदाफ हुसेन यांच्या मते, या प्रश्नाचे उत्तर सरळ नाही. ते सांगतात की बंगाल आणि आग्नेय आशियातील देशांमध्ये शतकानुशतके व्यापार, सांस्कृतिक देवाणघेवाण आणि वसाहतवादी संबंध होते. त्यामुळे काही खाद्यपदार्थांमध्ये साम्य आढळणे स्वाभाविक आहे.

मलेशियातील लाक्सा (Laksa) किंवा सिंगापूरमधील उदांग मसाक लेमाक (Udang Masak Lemak) यांसारख्या नारळाच्या दुधावर आधारित समुद्री खाद्यपदार्थांमध्ये आणि चिंग्री मलाई करीमध्ये काही समानता दिसून येते. मात्र याचा अर्थ हा पदार्थ थेट तिथून आला, असे म्हणता येत नाही.