மணிப்பூர் மாநிலம் காங்போக்பி மாவட்டத்தில் இரு பழங்குடியின சமூகங்களைச் சேர்ந்த ஆயுதமேந்திய நபர்களுக்கு இடையே இன்று திங்கள்கிழமை காலை வழக்கத்திற்கு மாறாகப் பயங்கரமான மோதல் ஒன்று ஏற்பட்டுள்ளது. அந்த மாவட்டத்தின் லெய்லோன் வைபே கிராமத்திற்கு அருகே காலை 6 மணியளவில் இந்த இரு தரப்பினரும் திடீரென ஒருவரையொருவர் நோக்கி அனல் பறக்கும் துப்பாக்கிச்சூட்டில் அதிரடியாக ஈடுபட்டனர். இந்த திடீர் துப்பாக்கிச்சூடு சம்பவத்தால் அந்த கிராமப் பகுதி முழுவதும் பெரும் கூச்சலும் குழப்பமும் ஏற்பட்டு ஒட்டுமொத்தப் பகுதியும் போர்க்களமாக மாறியது.

இந்த பயங்கரமான துப்பாக்கிச் சண்டையின் நடுவே சிக்கி அந்தப் பகுதியைச் சேர்ந்த 3 இளைஞர்கள் குண்டு பாய்ந்து பலத்த காயமடைந்ததாக அதிகாரிகள் தற்பொழுது தெரிவித்துள்ளனர். காயமடைந்த அவர்கள் கென்லென்மாங் வைபே (18), லுன்லியாண்டாவ் வைபே (20) மற்றும் பாவுகோ லால் (18) என அடையாளம் காணப்பட்டுள்ளனர். துப்பாக்கிச்சூடு சத்தம் கேட்டு விரைந்து வந்த பாதுகாப்புப் படையினர், இரத்த வெள்ளத்தில் உயிருக்குப் போராடிக் கொண்டிருந்த அந்த 3 இளைஞர்களையும் உடனடியாக மீட்டு இம்பாலில் உள்ள பிராந்திய மருத்துவ அறிவியல் கழகத்திற்குச் சிகிச்சைக்காக அனுப்பி வைத்தனர்.

குகி சமூகத்தினர் பெரும்பான்மையாக வாழும் காங்போக்பி மாவட்டத்தில் இந்த திடீர் வன்முறை வெடித்ததைத் தொடர்ந்து அந்தப் பகுதியில் தற்பொழுது பலத்த பதற்றம் நிலவி வருகிறது. அசம்பாவிதங்களைத் தடுக்கும் நோக்கில் கலவரம்  நடந்த இடத்திலும் மற்றும் இளைஞர்கள் சிகிச்சை பெற்று வரும் மருத்துவமனை வளாகத்திலும் கூடுதல் மத்தியப் படைகள் அதிரடியாகக் குவிக்கப்பட்டுப் பாதுகாப்புப் பலப்படுத்தப்பட்டுள்ளது. இந்த  துப்பாக்கிச்சூடு சம்பவம் குறித்துப் பாதுகாப்புப் படையினரும் காவல்துறையினரும் வழக்குப்பதிவு செய்து   ஆயுதமேந்திய கும்பலைத் தேடி தீவிர விசாரணை நடத்தி வருகின்றனர்.