गडचिरोली जिल्ह्यातील चामोर्शी तालुक्यातील आष्टी पोलीस ठाण्याच्या हद्दीतील बामणपेठजवळ सोमवारी सकाळी एक धक्कादायक घटना घडली. भरदिवसा पतीने पत्नीवर धारदार चाकूने सपासप वार केल्याने परिसरात एकच खळबळ उडाली आहे. या हल्ल्यात कनिका दास उर्फ कनिका विश्वजीत मंडल या गंभीर जखमी झाल्या असून त्यांच्यावर प्राथमिक उपचार करण्यात आल्यानंतर पुढील उपचारासाठी दुसऱ्या रुग्णालयात हलविण्यात आले आहे.

प्राथमिक माहितीनुसार, आरोपी ब्रजकेश दास याने बामणपेठ जंगल मार्गावर पत्नी प्रवास करत असलेल्या दुचाकीचा पाठलाग केला. त्यानंतर त्याने त्यांच्या दुचाकीला जाणूनबुजून धक्का दिला. धक्का बसल्यानंतर कनिका या रस्त्यावर कोसळल्या. त्या सावरण्याचा प्रयत्न करत असतानाच आरोपीने धारदार चाकू काढून त्यांच्या हात, पाय, पोट आणि मानेवर सपासप वार केले. अचानक झालेल्या या हल्ल्यामुळे परिसरात मोठी खळबळ उडाली. हल्ल्यानंतर आरोपी घटनास्थळावरून तात्काळ फरार झाला.

घटनेची माहिती मिळताच स्थानिक नागरिकांनी तातडीने पोलिसांना कळवलं. तसंच जखमी महिलेला आष्टी ग्रामीण रुग्णालयात दाखल करण्यात आले. डॉक्टरांनी त्यांच्यावर प्राथमिक उपचार केले. मात्र प्रकृती गंभीर असल्याने अधिक चांगल्या उपचारांसाठी त्यांना पुढील रुग्णालयात पाठवण्यात आलं. सध्या त्यांच्यावर उपचार सुरू असून डॉक्टरांकडून प्रकृतीवर बारकाईने लक्ष ठेवण्यात येत आहे.

या हल्ल्यामागील नेमकं कारण अद्याप स्पष्ट झालेले नाही. आष्टी पोलिसांनी या प्रकरणी गुन्हा नोंदवून तपास सुरू केला आहे. फरार झालेल्या आरोपीचा शोध घेण्यासाठी विशेष पथके रवाना करण्यात आली आहेत. या प्रकरणाचा पुढील तपास पोलीस निरीक्षक विशाल काळे यांच्या मार्गदर्शनाखाली सहाय्यक पोलीस निरीक्षक मदन म्हस्के करत आहेत.

दिवसाढवळ्या घडलेल्या या थरारक घटनेमुळे बामणपेठ परिसरात भीतीचं वातावरण पसरलं असून नागरिकांमध्ये या घटनेची जोरदार चर्चा सुरू आहे. आरोपीला लवकर अटक करून कठोर कारवाई करण्यात यावी, अशी मागणीही स्थानिकांकडून केली जातेय.