अवघ्या 1 तासात IPO 100 टक्के भरला, 260 रुपयांचा मजबूत जीएमपी, लिस्टिंगला मोठ्या नफ्याचे संकेत
ET Marathi July 28, 2026 05:45 PM
मुंबई : पुणेस्थित ॲल्युमिनियम डाय-कास्टिंग आणि मशिनिंग कंपोनंट्सची उत्पादक कंपनी पूजा प्रिसिजन इंजिनिअरिंगचा आयपीओ आज २८ जुलै २०२६ पासून गुंतवणूकदारांसाठी खुला झाला आहे. आयपीओ सुरू होताच गुंतवणूकदारांच्या यावर उड्या पडल्या. केवळ एका तासात पूजा प्रिसिजन इंजिनिअरिंगचा आयपीओ १०० टक्के सबस्क्राईब झाला. रिटेल कॅटेगरीला सर्वाधिक म्हणजेच तीन पट सबस्क्रिप्शन मिळाले. या आयपीओने ग्रे मार्केटमध्येही धुमाकूळ घातला आहे. त्यामुळे फायदेशीर लिस्टिंग होण्याची शक्यता आहे.
किंमत बँड
पूजा प्रिसिजन इंजिनिअरिंग ३१ जुलैपर्यंत खुला राहील. कंपनी आयपीओतून १५९.८३ कोटी रुपये उभारणार आहे. यामध्ये फक्त नवीन शेअर्स जारी केले जातील. कंपनीने किंमत बँड प्रति शेअर २८५ रुपये ते ३०१ रुपये असा निश्चित केला आहे. तर लॉट आकार ४०० शेअर्सचा आहे. रिटेल गुंतवणूकदारांना किमान ८०० शेअर्सवर बोली लावावी लागेल. किमान गुंतवणूक २४०,८०० रुपये असेल.
पूजा प्रिसिजन इंजिनिअरिंग जीएमपी
हा आयपीओ ग्रे मार्केटमध्ये मजबूत स्थितीत आहे. कंपनीचे शेअर्स २६० रुपयांच्या प्रीमियमवर ट्रेड करत आहे. आजची जीएमपी ८६% चा लिस्टिंग प्रीमियम दर्शवते. आयपीओसाठी आतापर्यंतची सर्वाधिक जीएमपी २६० रुपये आणि सर्वात कमी जीएमपी १९५ रुपये प्रति शेअर राहिली आहे. मिळण्याचे हे संकेत आहेत.
अँकर गुंतवणूकदारांकडून ४५ कोटी उभारले
आयपीओ सुरू होण्यापूर्वीच कंपनीने अँकर गुंतवणूकदारांकडून ४५.१ कोटी रुपये उभारले आहेत. कंपनीने अँकर बुकद्वारे १४ अँकर गुंतवणूकदारांना प्रति शेअर ३०१ रुपयांच्या उच्च किंमत पट्ट्यावर १४.९९ लाख शेअर्सचे वाटप केले. गुंतवणूकदार सुनील सिंघानिया यांच्या अँकर फंड 'अॅबॅकस व्हेंचर ऑपर्च्युनिटीज'ने १४ कोटी रुपयांना ४.६५ लाख शेअर्स खरेदी केले. मोतीलाल ओसवाल ग्रुपच्या एनबीएफसी युनिटने ५.५ कोटी रुपयांची गुंतवणूक करून १.८२ लाख शेअर्स मिळवले. यामध्ये मिंट फोकस्ड ग्रोथ फंड, हेम ग्रोथ ऑपर्च्युनिटीज, इंडिया मॅक्स इन्व्हेस्टमेंट्स, मेरू इन्व्हेस्टमेंट आणि सेंट कॅपिटल फंड यांसारख्या नावांचा समावेश होता.
आयपीओ निधीचा वापर
पूजा प्रिसिजन इंजिनिअरिंग १०६.३४ कोटींचा वापर उत्पादन केंद्र उभारण्यासाठी करेल. कंपनी ३० कोट रुपयांचा वापर खेळत्या भांडवलासाठी (वर्किंग कॅपिटल) करेल. उर्वरित निधीचा वापर सर्वसाधारण कॉर्पोरेट कामांसाठी केला जाईल.
कंपनी काय करते?
१९९२ मध्ये स्थापित पूजा प्रिसिजन इंजिनिअरिंग ही पुणेस्थित एक प्रिसिजन इंजिनिअरिंग कंपनी आहे. ही कंपनी ऑटोमोटिव्ह (ईव्ही पॉवरट्रेन, ड्राइव्हट्रेन) आणि नॉन-ऑटोमोटिव्ह (संरक्षण, कृषी, ऊर्जा, आरोग्यसेवा) क्षेत्रांसाठी ६०० हून अधिक प्रकारचे ॲल्युमिनियम डाय-कास्टिंग घटक तयार करते. कंपनीचे सध्या पुण्यात दोन उत्पादन प्रकल्प असून त्यांची एकूण वार्षिक वितळण क्षमता १३,८०० मेट्रिक टन आहे. याव्यतिरिक्त, कंपनी मॅग्नेशियम घटकांच्या (युनिट IV) उत्पादनापर्यंत आपल्या व्यवसायाचा विस्तार करत आहे.
