भारतात रोज नवनवीन स्मार्टफोन लाँच होत असतात. अशातच सरकारी मालकीच्या दूरसंचार कंपनी बीएसएनएलने भारतात एक नवीन सॅटेलाइट फोन लाँच केला आहे. मात्र लाँच करण्यात आलेला हा सॅटेलाइट फोन व्यावसायिक वापरण्याच्या दृष्टीने तयार करण्यात आलेला आहे. तसेच हा फोन जर तुम्हाला खरेदी करून वापरायचा असेल तर परवानगीशिवाय त्याचा वापर करू शकत नाही. दूरसंचार विभागाने (DoT) स्पष्टपणे सांगितले आहे की, वापरकर्ते किंवा संस्था केवळ परवानगी मिळाल्यानंतरच या सॅटेलाइट फोनचा वापर करू शकतात. चला तर मग आजच्या लेखात आपण या फोनची किंमत आणि फायदे जाणून घेऊयात.

तुम्ही प्रवासात असताना अगदी जिथे टेरेस्ट्रियल नेटवर्क्स नाहीत अशा भागांमध्येही कम्युनिकेशन नेटवर्कशी कनेक्ट होऊ शकता. तुम्ही कुठेही व्हॉईस कॉल करू शकता आणि गरज पडल्यास आपत्कालीन मदत मिळवू शकता. बीएसएनएल सॅटेलाइट फोन वापरल्याने वापरकर्त्यांना बॅटरीचा जास्त काळ टिकणारा बॅकअपही मिळतो. सॅटेलाइट नेटवर्क्स अशा भागांपर्यंत पोहोचू शकतात जिथे मोबाईल नेटवर्क्स पोहोचू शकत नाहीत.

सरकारी मालकीच्या दूरसंचार कंपनीचा हा सॅटेलाइट फोन 1 लाख 34 हजार 166 रूपयांच्या (टॅक्ससहित) किमतीत लाँच करण्यात आला आहे. किमतीच्या बाबतीत हा फोन ॲपल आयफोन 17, आयफोन 17 प्रो आणि सॅमसंगच्या नवीनतम गॅलेक्सी एस26 अल्ट्रापेक्षा अधिक महाग आहे.

या सॅटेलाइट फोनबद्दल अधिक माहितीसाठी तुम्ही तुमच्या जवळच्या बीएसएनएल कार्यालयाला भेट देऊ शकता किंवा 9768866652 या क्रमांकावर कॉल करू शकता. बीएसएनएलने एका पोस्टमध्ये म्हटले आहे की, हा फोन संरक्षण, सागरी कारवाया, आपत्ती निवारण, खाणकाम, दुर्गम भाग, यात्रेकरू आणि साहसी प्रवासासाठी आदर्श आहे.

सॅटेलाइट फोन मजबूत आणि टिकाऊ असतात. मात्र तुम्ही हा सॅटेलाइट फोन शोधत असाल, तर तो तुम्हाला भारतात कुठेच सहजासहजी मिळणार नाही. कारण भारत सरकार कोणालाही सॅटेलाइट फोन सहजपणे वापरण्याची परवानगी देत ​​नाही. बीएसएनएलने अंदाजे 99 हजार साइट्स लाँच केल्या असून, वापरकर्त्यांना 4जी सेवा देण्यासाठी ते आधीच कार्यरत आहे.