१९ वर्षांपूर्वी प्रदर्शित झालेल्या 'नवरा माझा नवसाचा' या चित्रपटाला प्रेक्षकांनी डोक्यावर घेतलं. या चित्रपटातील प्रत्येक वाक्य प्रेक्षकांच्या लक्षात आहे. आजही ते डायलॉग चाहते आवडीने बोलतात. या चित्रपटातील गाणीही प्रेक्षकांच्या तोंडी असतात. अतिशय चांगले कलाकार आणि गुंतवून ठेवणारी कथा यामुळे हा चित्रपट कल्ट क्लासिक म्हणून गणला जातो. आता याच चित्रपटाचा दुसरा भाग प्रेक्षकांच्या भेटीला आला आहे. 'नवरा माझा नवसाचा २' हा चित्रपट २० सप्टेंबर रोजी प्रेक्षकांच्या भेटीला आला आहे. आणि या चित्रपटाने पहिल्याच दिवशी बॉक्स ऑफिसवर कमाल केली आहे.

या चित्रपटात अनेक दिग्गज कलाकारांची फौज आहे. सचिन पिळगावकर, स्वप्नील जोशी आणि सुप्रिया पिळगावकर यांनी चित्रपटाचं जोरदार प्रमोशन केलं होतं. तर काल २० सप्टेंबर रोजी राष्ट्रीय सिनेमा दिवस साजरा करण्यात आला. त्याचाही या चित्रपटाला फायदा झाला आहे. या चित्रपटाला प्रेक्षकांच चांगला प्रतिसाद लाभला आहे. sacnilk ने दिलेल्या माहितीनुसार पहिल्याच दिवशी या चित्रपटाने १ कोटी ७० लाखांची कमाई केली आहे. पहिल्याच दिवशी चित्रपटासाठी प्रेक्षकांनी गर्दी केली होती. आता पुढे शनिवार रविवार असल्याचा या चित्रपटाला फायदा होण्याची शक्यता आहे. त्यामुळे चित्रपटाची कमाई आणखी वाढण्याचा अंदाज आहे.

दुसरीकडे नवरा माझा नवसाचा प्रमाणेच नवरा माझा नवसाचा दोन मध्येही एका नवसाची गोष्ट दाखवण्याचा प्रयत्न करण्यात आला आहे. यंदा हा प्रवास एसटी मधून नाहीये. तर तो प्रवास आहे कोकण रेल्वेमधून. सचिन पिळगावकर, स्वप्निल जोशी, सुप्रिया, निर्मिती सावंत यांच्यासारखे सुपरस्टार. महाराष्ट्र भूषण अशोक सराफ यांच्यासारखा दिग्गज नट. सिद्धार्थ जाधव, वैभव मांगले, हरीश दुधाणे यांच्यासारखे कलाकारही चित्रपटात आहेत. आता चित्रपटाच्या एकूण कलेक्शनवर सगळ्यांचं लक्ष आहे.