Body Wash: आज जसा काळ बदलत आहे, तसा सुविधांमध्ये देखील बदल घडून येत आहे. अगदी अंघोळ करण्याच्या पद्धती आणि त्यासाठी वापर करण्यात येणारे साहित्यांमध्ये देखील बदल होत आहे. आज बहुतेक लोकं साबणाऐवजी बॉडी वॉश वापरू लागले आहेत. हे बॉडी वॉश त्वचेला आर्द्र आणि मुलायम ठेवण्यास मदत करतात. त्यामुळे याची मागणी वाढत आहेत. पण हे बॉडी वॉश खरंच फायदेशीर आहे का?

आजकाल बाजारात प्रत्येक त्वचेच्या प्रकारानुसार बॉडी वॉश मिळून जातात, पण साबणाच्या बाबतीत तसे होत नाही. त्यामुळेदेखील बॉडीवॉशला लोकं अधिक प्राधान्य देऊ लागले आहे.जर तुम्हीदेखील आंघोळीसाठी साबणाऐवजी बॉडी वॉशचा वापर करत असाल तर त्याचे फायदे आणि तोटे दोन्ही जाणून घेणे आवश्यक आहे.

• बॉडी वॉशमध्ये त्वचेला आर्द्रता देणारे अनेक घटक असतात, तर साबणात आढळणारे घटक अनेकदा त्वचा कोरडी करतात. त्यामुळे बॉडी वॉशचा नियमित वापर केल्याने तुमच्या त्वचेची आर्द्रता टिकून राहते.
• बॉडी वॉशमध्ये अनेक सुगंधी घटक असतात, जे तुम्हाला ताजेतवाने अनुभव देतात. उष्ण आणि दमट हवामानातही ते फ्रेश ठेवू शकतात. पण साबण तसे करत नाही.
• बॉडी वॉश बंद बाटलीत असतो, त्यामुळे साबणाप्रमाणे घाणेरडे हात त्याला लागत नाही, यामुळे कोणत्याही प्रकारच्या जंतूंचा प्रादुर्भाव होण्याची भीती यामध्ये नसते.
• काही बॉडी वॉशमध्ये स्क्रब कण असतात, जे डेड स्किन काढून टाकून एक्सफोलिएशन म्हणून काम करतात, त्वचा आणखी उजळ करतात.

• बाजारात उपलब्ध असलेल्या अनेक प्रकारच्या बॉडी वॉशमध्ये सल्फेट्स, पॅराबेन्स सारखी तीक्ष्ण रसायने असतात, जी त्वचेला हानी पोहोचवू शकतात.
• त्यामुळे तुमची त्वचा जर संवेदनशील असेल तर त्याचा वापर करताना योग्य ती काळजी घेणे गरजेचे आहे. त्यासाठी बॉडी वॉशची खरेदी करताना यामध्ये असलेल्या घटकांची माहिती जाणून घ्या.
• सामान्य वापरात असलेल्या साबणापेक्षा बॉडी वॉश अधिक महाग असतात, तसेच ते अधिक लवकर संपते. त्यामुळे बजेटमध्ये खर्च करायचा असेल तर प्रत्येकांना बॉडीवॉशचा वापर करता येणे शक्य होत नाही.