MHADA Thane Lottery 2024: ठाण्यात तुम्ही आपल्या हक्काचं आणि स्वप्नातलं घर खरेदी करण्याचा विचार करत असाल तर हे स्वप्न आता लवकरच पूर्ण होणार आहे. कारण, म्हाडाच्या मुंबईतील 2030 घरांची ऑनलाईन सोडत पार पडल्यानंतर आता म्हाडाच्या कोकण मंडळाकडून घरांसाठी लॉटरी जाहीर करण्यात येणार आहे.

आपले स्वप्न पूर्ण करणारे शहर आणि देशाची आर्थिक राजधानी असलेल्या मुंबईत आपल्या हक्काचे घर असावे असे सर्वसामान्य नागरिकांचे स्वप्न असते. हे स्वप्न पूर्ण करण्यासाठी राज्य शासन म्हाडाच्या माध्यमातून सर्वतोपरी प्रयत्न करीत असते. म्हाडाच्या मुंबईतील घरांची सोडत पार पडल्यावर आता ठाणे, वसई-विरार, कल्याण-डोंबिवली परिसरातील घरांच्या विक्रीसाठी लॉटरी जाहीर करण्यात येणार आहे.

ठाण्यातील घरांसाठी लॉटरी कडून 12 हजार घरांच्या विक्रीसाठी लॉटरी जाहीर करण्यात येणार आहे. या 12 हजार घरांपैकी दोन हजार घरांची लॉटरी गुरुवारी जाहीर करण्यात येणार आहे. तर 10 हजार घरांची थेट विक्रीची प्रक्रिया सुद्धा गुरुवारपासून सुरू होणार असल्याची माहिती समोर आली आहे.

म्हाडाच्या कोकण मंडळातील अनेक घरे ही तयार आहेत मात्र त्यांची विक्री होत नाहीये. पाणी, रस्ते अशा सुविधांच्या अभावांमुळे घरांची विक्री होत नसल्याने काही लॉटरीतील विजेत्यांनी आपली घरे परत केली आहेत. पण या इमारतींच्या ठिकाणी आता सोयी-सुविधा पुरवण्यात येत आहेत. त्यामुळे म्हाडाने आपली ही घरे आता विक्रीसाठी उपलब्ध करुन देण्याचा निर्णय घेतला आहे. यामधील 10 हजार घरांच्या थेट विक्रीसाठी इच्छुक आपले अर्ज दाखल करु शकतात.

हे पण वाचा :

20 लाखांत घर
म्हाडाच्या कोकण मंडळाकडून काढण्यात येणाऱ्या या लॉटरीत खासगी बिल्डरांकडून म्हाडाला प्राप्त झालेल्या घरांचा समावेश असणार आहे. ही घरे ठाणे शहर, टिटवाळा, वसई परिसरात असणार आहेत. तसेच या घरांच्या किमती 20 लाख आणि त्याच्या आसपास असणार असल्याचं वृत्त समोर येत आहे. त्यामुळे ठाण्यासारख्या शहरात आपल्या स्वप्नातलं आणि हक्काचं घर खरेदी करण्याचं सर्वसामान्यांचं स्वप्न आता लवकरच पूर्ण होणार आहे.

मुंबईत म्हाडाची पुन्हा लॉटरी
म्हाडाच्या मुंबईतील 2030 घरांची लॉटरी काढण्यात आल्यानंतर आता म्हाडाकडून मुंबईतील घरांसाठी आणखी एक लॉटरी काढण्यात येणार आहे. मार्च 2025 मध्ये मुंबईतील घरांची लॉटरी काढण्यात येणार असल्याची माहिती म्हाडाने दिली आहे.