संजू सॅमसनने एका मुलाखतीत सांगितले की, ‘लहानपणी तुला गौतम गंभीरला प्रभावित करायचे होते. तो एलबी शास्त्री क्रिकेट अकादमीत यायचा आणि त्यानंतर जेव्हा मी माझे पहिले T20 आंतरराष्ट्रीय शतक झळकावले, तेव्हा गौतम गंभीर माझ्यासाठी सर्वात आनंदी होता. प्रशिक्षक तुमच्यावर विश्वास ठेवतो आणि तुमच्या पाठीशी उभा असतो. तुम्हाला चांगली कामगिरी करायची असते आणि प्रशिक्षकाने तुमच्यावर दाखवलेला विश्वास सार्थ ठरवायचा असतो. मला पहिल्या दोन सामन्यांमध्ये चांगली कामगिरी करता आली नाही, त्यामुळे मला गंभीरच्या नजरेला नजर मिळवताना त्रास होत होता. पण मी स्वतःला सांगितले की माझी वेळ येईल. त्यानंतर मी शतक ठोकले, तेव्हा गौतम गंभीर माझ्यासाठी टाळ्या वाजवत होता. त्याचा मला खूप आनंद झाला.

जेव्हा संजू सॅमसन बांगलादेशविरुद्धच्या पहिल्या दोन T20 सामन्यांमध्ये अपयशी ठरला, तेव्हा त्याला खूप ट्रोल करण्यात आले. मात्र यानंतर या खेळाडूने अवघ्या 47 चेंडूत 111 धावांची खेळी करत खळबळ उडवून दिली. संजूने या खेळीत 8 षटकार आणि 11 चौकार लगावले. संजूने आपली प्रतिभा सिद्ध केली. आता पुढील महिन्यात होणाऱ्या दक्षिण आफ्रिकेविरुद्धच्या टी-20 मालिकेत संजू सॅमसन दिसणार आहे. टीम इंडिया नोव्हेंबरमध्ये दक्षिण आफ्रिका दौऱ्यावर चार टी-20 सामन्यांची मालिका खेळणार आहे.