Potato : घरात कोणतीही भाजी नसली की महिला बटाट्याची भाजी बनवतात. आपल्या स्वयंपाकघरात बाकी काही नसले तरी बटाटे मात्र असतातचं. बटाट्यापासून बनवलेले पदार्थ नाश्त्यामध्ये खाणं अधिक चांगलं असतं. कार्बोहायड्रेट, व्हिटॅमिन सी, पोटॅशियमसारखी अनेक पोषकतत्वे असलेल्या बटाट्यापासून अनेक पदार्थ तयार करता येतात. आज आपण बटाट्यापासून बनवल्या जाणाऱ्या नाश्त्याच्या 7 पदार्थांची रेसिपी ( In Marathi) जाणून घेणार आहोत. बटाटाप्रेमींना हे नाश्त्याचे ऑप्शन्स नक्की आवडतील. ( For Breakfast)

आलू पराठे (Aloo Paratha) साहित्य - बटाटा, कणिक, कांदा (आवडत असल्यास) हिरवी मिरची किंवा तिखट, कोथिंबीर, मीठ, तेल, पाणी, जिरे
कृती - सगळ्यात आधी बटाटे उकडवून घ्या. ते थोडे थंड झाल्यावर त्याचे साल काढून ते मॅश करुन त्यात कांदा, कोथिंबीर, मिरचीचे तुकडे अथवा तिखट, कोथिंबीर, जिरे मिक्स करा. दुसरीकडे एका भांड्यात गव्हाचं पीठ घेऊन त्यात आवश्यकतेनुसार पाणी आणि मीठ टाका आणि थोडे तेल टाका आणि कणिक मळून घ्या. कणकेच्या गोळ्यामध्ये बटाट्याचं सारण भरा आणि पराठा लाटून घ्या. त्यानंतर तव्यावर बटर किंवा तेल लावून पराठा छान भाजून घ्या. दही किंवा टोमॅटो सॉससोबत पराठा सर्व्ह करा. (Aloo Paratha Recipe)


आलू टिक्की (Aloo Tikki) साहित्य - उकडलेले बटाटे, कांदे, हिरवी मिरची. कोथिंबीर, मसाले, ब्रेडक्रम्ब्स, तेल
कृती - उकडलेले बटाटे मॅश करुन घ्या त्यात कांदा, हिरव्या मिरचीचे तुकडे, कोथिंबीर आणि आवडीनुसार मसाले टाका. छोटी टिक्की बनवा. टिक्की ब्रेडक्रम्ब्समध्ये रोल करुन तेलावर तळून घ्या. तुम्हाला आवडत असेल तर तुम्ही टिक्की ओव्हनमध्ये बेकदेखील करु शकता. (Aloo Tikki Recipe)


बटाट्याचा चीला (Potato Cheela) साहित्य - बटाटे, पाणी, बेसन पीठ, कॉर्न स्टार्च, जिरे, मीठ, हळद, तिखट किंवा हिरवी मिरची, आवडत असल्यास आमचूर पावडर किंवा चाट मसाला
कृती - कच्च्या बटाट्याचे साल काढून घ्या. त्यानंतर बारीक किसणीने बटाटे व्यवस्थित किसून घ्या. बटाट्याचा किस एका भांड्यात घेऊन त्यात पाणी टाका. किस व्यवस्थित धुवून घ्या. त्यामुळे बटाट्यामधील एक्स्ट्रा स्टार्च निघून जाईल. नंतर तो बटाट्याचा किस एका भांड्यात काढा. त्यात बेसन पीठ आणि कॉर्न स्टार्च टाका. मग जिरे, मीठ, हळद , लाल तिखट किंवा हिरवी मिरची टाका. आवडत असेल तर यात आमचूर पावडर किंवा चाट मसाला टाका. थोडं पाणी टाका. मिश्रण ओलसर असूदेत मात्र खूप पातळ होऊ देऊ नका.

तवा गरम झाल्यावर त्यावर पाणी शिंपडा. ते पाणी कापडाने पुसा. त्यामुळे तव्याचं तापमान नियंत्रणात राहील. आता तव्यावर थोडं तेल टाका. तेल पसरवून त्यावर बटाट्याचं मिश्रण टाका आणि ते गोलाकार पसरवा. झाकण ठेवा. बटाट्याचा चीला पाच मिनिटे मध्यम आचेवर शिजू द्या. त्यानंतर झाकण काढून बाजूने तेल टाका. दोन मिनिटे चीला उघड्यावर शिजू द्या. लालसर रंग आल्यावर तव्यावरुन काढून टोमॅटो सॉससोबत सर्व्ह करा. (Potato Cheela Recipe)


बटाट्याचे चिप्स (Potato Chips) साहित्य - बटाटे, तेल, पाणी, मीठ, इतर मसाले
कृती - बटाट्याचे पातळ स्लाईस करुन घ्या. हे स्लाईस थोडा वेळ पाण्यात बुडवून ठेवा. त्यानंतर तेलात बटाट्याचे स्लाईस तळा. मीठ आणि आवडीनुसार इतर मसाले टाकून सर्व्ह करा. बटाट्याचे चिप्स ओव्हनमध्येही बेक करता येतात. (Potato Chips Recipe)


बटाटे वडा (Batata Wada) साहित्य - बटाटे, हिरवी मिरची, लसूण,बेसन, पाणी, तेल, कोथिंबीर, मीठ
कृती - उकडलेल्या बटाट्याचं साल काढून मॅश करुन घ्या. हिरवी मिरची, मीठ, लसूण आणि कोथिंबीर मिक्सरमध्ये नीट वाटून घ्या. मिरचीचा हा ठेचा बटाट्यामध्ये मिक्स करा. दुसऱ्या एका भांड्यात बेसनामध्ये थोडं पाणी आणि तेल मिक्स करा. बटाट्याचे वडे बेसनाच्या मिश्रणात बुडवून कढईत नीट तळून घ्या. बटाट्याचा वडा पाव आणि लसूण चटणीसोबत सर्व्ह करा. (Batata Wada Recipe)


बटाट्याचे कटलेट (Potato Cutlet) साहित्य - बटाटे, पोहे, मीठ, चाट मसाला, लाल तिखट, जिरेपूड
कृती - सगळ्यात आधी बटाटे उकडून घ्या आणि कुस्करुन घ्या. थोडे पोहे मिक्सरमधून बारीक वाटून पावडर करुन घ्या. पोह्याची पावडर बटाट्याच्या मिश्रणात टाका. आता त्यात आवडीनुसार मीठ, चाट मसाला, लाल तिखट आणि जिरेपूड घाला. या मिश्रणाचे छोटे गोळे तयार करा. त्याला कटलेटसारखा आकार द्या. डीप फ्राय करा आणि सॉस किंवा चटणीसोबत सर्व्ह करा. (Potato Cutlet Recipe)


आलू टिक्की बर्गर (Aloo Tikki Burger) साहित्य - आलू टिक्की, बन्स, सॅलड, चटणी, पनीर
कृती - बर्गरते बन्स मधून कापून घ्या. एका भागावर आलू टिक्की, सॅलड, चटणी आणि पनीर ठेवा. दुसऱ्या भागाने हे मिश्रण झाका. आजकाल फ्रोझन आलू टिक्कीदेखील अनेक ठिकाणी बाजारात उपलब्ध आहे. तुम्ही त्याचा वापर करुन आलू टिक्की बर्गर बनवू शकता. (Aloo Tikki Burger Recipe)

सूचना (Tips For Potato Recipes)

• बटाट्यापासून कोणताही पदार्थ बनवण्याआधी बटाटे व्यवस्थित धुवून घ्या आणि मग त्याचे साल काढा.
• बटाटा शिजवताना त्यात मीठ कमी टाका. कारण तळताना त्यात हवे असल्यास मीठ टाकता येते.
• बटाट्याचा पदार्थ तळताना तेल खूप जास्त गरम होऊ देऊ नका. जास्त तापलेल्या तेलामध्ये बटाटे करपून जातील.
• तुम्हाला तेलकट पदार्थ आवडत नसतील तर तुम्ही बटाट्याचे काही पदार्थ ओव्हनमध्ये बेक करुनही तयार करु शकता.
• तुमच्या प्रकृतीनुसार बटाट्यापासून बनवल्या जाणाऱ्या नाश्त्याच्या पदार्थाची निवड करा.