वडगाव मावळ, ता.१३ : मावळ विधानसभा मतदारसंघातील मतदारांना घरोघरी जाऊन मतदार चिठ्ठ्या देण्याचे काम सोमवारपासून सुरू करण्यात आले असल्याची माहिती निवडणूक अधिकारी सुरेंद्र नवले व सहाय्यक निवडणूक अधिकारी विक्रम देशमुख यांनी दिली.
मावळ तालुक्यातील एकूण मतदारांची संख्या ३ लाख ८६ हजार १७२ असून मतदान केंद्रांची संख्या ४०२ इतकी आहे. प्रत्येक ठिकाणी मतदान केंद्र स्तरीय अधिकाऱ्यांची (बीएलओ) नेमणूक करण्यात आलेली आहेत. संबंधित मतदान केंद्राच्या बीएलओमार्फत मतदारांना मतदार चिठ्ठ्यांचे घरोघरी वाटप करण्यात येत आहेत. मतदारांची मतदान केंद्र व अनुक्रमांक शोधण्याची ऐनवेळी होणारी धावपळ टाळण्यासाठी प्रशासनाने मतदानापूर्वी मतदार चिठ्ठ्या घरपोच कराव्यात, अशी नागरिकांनीही मागणी केली होती.